Իրանում պատասխանել են Թրամփի սպառնալիքին
ԱՄՆ նախագահ Դոնալդ Թրամփը պետք է իմանա, որ ամերիկյան միջամտությունը Իրանի ներքին գործերին համարժեք է քաոսի ամբողջ տարածաշրջանում և ամերիկյան շահերի ոչնչացմանը․ հայտարարել է Իսլամական Հանրապետության ազգային անվտանգության խորհրդի քարտուղար Ալի Լարիջանին։
Նրա խոսքով՝ երկրի իշխանությունը տարանջատում է բողոք արտահայտող իրանցիներրի կարծիքը «ապակառուցողական տարրերի» դիրքորոշումներից։
«Հաշվի առնելով իսրայելցի պաշտոնյաների և Թրամփի կողմից ընդունված դիրքորոշումները՝ վիճակը պարզ է դարձել․ մենք բողոքող առևտրականների դիրքորոշումները դիտարկում ենք առանձին՝ խաթարող տարրերի դիրքորոշումներից, և Թրամփը պետք է իմանա, որ ամերիկյան միջամտությունը ներքին հարցին համարժեք է քաոսի ամբողջ տարածաշրջանում և ամերիկյան շահերի ոչնչացմանը», – գրել է իրանցի պաշտոնյան X սոցցանցի իր էջում։
Բացի Լարիջանիից՝ Թրամփի հայտարարությանը պատասխանել է նաև Իրանի գերագույն առաջնորդի խորհրդական Ալի Շամհանին՝ նշելով, որ «զավթիչի ձեռքը կկտրվի նախքան Իրանի անվտանգությանը վնաս հասցնելը»։
Հիշեցնենք՝ Իրանում տեղի են ունենում զանգվածային ցույցեր, որոնք հանգեցրել են բախումների իրավապահների և ցուցարարների միջև Հանրապետության տարբեր շրջաններում․ այս ֆոնին Թրամփը սպառնացել է ռազմական գործողություն սկսել Իրանի դեմ, եթե երկրի իշխանությունը սպանի ցուցարարներին։
