Գրենլանդիան պետք է լինի Միացյալ Նահանգների մաս․ Սպիտակ տուն
Գրենլանդիան պետք է դառնա Միացյալ Նահանգների մաս՝ որպես ամերիկյան անվտանգության համակարգի մաս․ CNN-ի հետ զրույցում հայտարարել է Սպիտակ տան աշխատակազմի ղեկավարի տեղակալ Սթիվեն Միլլերը։ Նա չի բացառել կղզին ռազմական ճանապարհով գրավելու հնարավորությունը։
«Նախագահն ամիսներ շարունակ բացահայտորեն հայտարարել է. Գրենլանդիան պետք է լինի ԱՄՆ-ի ընդհանուր անվտանգության մաս։ Գրենլանդիան պետք է լինի Միացյալ Նահանգների անբաժանելի մասը։ Ոչ ոք չի մտնի Միացյալ Նահանգների հետ ռազմական բախման մեջ Գրենլանդիայի ապագայի շուրջ։ Դեռևս անհրաժեշտ չէ խոսել կամ մտածել ռազմական գործողության մասին», – ընդգծել է Միլլերը։
Երբ հաղորդավարը հարցրել է, թե արդյոք բացառվում է ռազմական միջամտությունը, Միլլերը խուսափել է ուղիղ պատասխանից և փոխարենը կասկածի տակ է դրել Դանիայի հավակնություններն Արկտիկայի տարածքի նկատմամբ։
«Ի՞նչն է հիմքում ընկած նրանց տարածքային հավակնությունների համար։ Ի՞նչն է հիմքում ընկած այն պնդման համար, որ Գրենլանդիան դանիական գաղութ է։ Եթե Միացյալ Նահանգները ՆԱՏՕ-ի գլխավոր տերությունն է, և եթե Միացյալ Նահանգները ցանկանում է ապահովել Արկտիկայի տարածաշրջանի անվտանգությունը և պաշտպանել ՆԱՏՕ-ի շահերը, ապա պարզ է, որ Գրենլանդիան պետք է լինի Միացյալ Նահանգների մաս։ Հետևաբար, մենք՝ որպես երկիր, կքննարկենք այս հարցը», – եզրափակել է նա։
