Ամերիկացի զինծառայողներին խորհուրդ է տրվել լքել Կատարի Ալ Ուդեյդ ավիաբազան․ Reuters

Կատարի Ալ Ուդեյդ ռազմաբազայի ամերիկացի որոշ զինծառայողների և աշխատակիցների կոչ է արվել ժամանակավորապես լքել օբյեկտը․ հաղորդում է Reuters-ը՝ հղում անելով դիվանագետներին:

«Սա վերադասավորում է, այլ ոչ թե հրահանգված տարհանում», – ասել է դիվանագետներից մեկը։ Նա նաև նշել է, որ տեղյակ չէ, թե արդյոք նշվե՞լ է անձնակազմի տեղաշարժի որևէ կոնկրետ պատճառ։

Ալ Ուդեյդը Մերձավոր Արևելքում ամենամեծ ամերիկյան ռազմական բազան է, որտեղ տեղակայված է մոտ 10,000 զինծառայող:

Նշենք, որ տեղափոխությունները տեղի են ունենում Իրանի նկատմամբ ուժ կիրառելու հնարավորության վերաբերյալ Սպիտակ տան հայտարարությունների ֆոնին։ Իրանում ավելի վաղ սպառնացել էին, որ երկրի վրա հարձակման դեպքում ամերիկյան ռազմաբազաները օրինական թիրախ կդառնան։