Ուիթքոֆը հայտնել է Գազայում խաղաղության ծրագրի երկրորդ փուլի մեկնարկի մասին
ԱՄՆ նախագահ Դոնալդ Թրամփի հատուկ բանագնաց Սթիվ Ուիթքոֆը հայտնել է Գազայի խաղաղության ծրագրի երկրորդ փուլի մեկնարկի մասին, որը նախատեսում է անցում հրադադարից ապառազմականացման, անկլավի տեխնոկրատական կառավարման և վերակառուցման։
«Երկրորդ փուլում նախատեսվում է ստեղծել Գազայի անցումային տեխնոկրատական պաղեստինյան վարչակազմ՝ Գազայի կառավարման ազգային կոմիտեն (NCAG), մեկնարկում է Գազայի լիակատար ապառազմականացումը և վերակառուցումը, նաև չարտոնված ողջ անձնակազմի զինաթափումը։
ԱՄՆ-ն ակնկալում է, որ ՀԱՄԱՍ-ը լիովին կկատարի իր պարտավորությունները, այդ թվում՝ վերջին մահացած պատանդի անհապաղ վերադարձը․ դա չանելը լուրջ հետևանքներ կունենա։
Կարևոր է, որ առաջին փուլը ապահովեց մարդասիրական օգնության տրամադրում, հրադադար, նաև բոլոր կենդանի պատանդների և 28 մահացած պատանդներից 27-ի մարմինների վերադարձը։ Մենք խորապես շնորհակալ ենք Եգիպտոսին, Թուրքիային և Կատարին իրենց անփոխարինելի միջնորդական ջանքերի համար, որոնք հնարավոր դարձրին մինչ օրս ողջ առաջընթացը», – գրել է դիվանագետը X-ի իր էջում։
