Թրամփն ու Ալիևը փոխանակվել են միմյանց գովերգող նամակներով
Ադրբեջանի նախագահ Իլհամ Ալիևը նամակ է հղել ԱՄՆ նախագահ Դոնալդ Թրամփին՝ շնորհակալություն հայտնելով «Խաղաղության խորհրդի» հիմնադիր անդամ դառնալու հրավերի համար։
«Ես ընդունում եմ այս հրավերը՝ որպես փոխադարձ հարգանքի վրա հիմնված Ադրբեջանի Հանրապետության և Ամերիկայի Միացյալ Նահանգների միջև փոխշահավետ գործընկերության նշան և որպես տարածաշրջանային և համաշխարհային մակարդակներում խաղաղության և կայունության խթանման գործում Ադրբեջանի դերի ճանաչում», – նշել է Ալիևը։
Նա երախտագիտություն է հայտնել Թրամփին՝ խաղաղությունն ամրապնդելու ջանքերի համար։
ԱՄՆ առաջնորդն, իր հերթին, գրել է․ «Ինձ համար մեծ պատիվ է հրավիրել Ձեզ՝ Ադրբեջանի նախագահին, միանալու Մերձավոր Արևելքում խաղաղությունն ամրապնդելու իմ պատմական և հիանալի նախաձեռնությանը և սկսելու այս համաշխարհային հակամարտության լուծման համարձակ նոր մոտեցում»։ Ըստ Թրամփի՝ «Խաղաղության խորհուրդը» երբևէ ստեղծված ամենատպավորիչ և ազդեցիկ խորհուրդն է, որը կծառայի որպես նոր միջազգային կազմակերպություն և անցումային մարմին։
«Մեր ջանքերը կօգնեն միավորել երկրների առանձնահատուկ խումբ, որը պատրաստ է աջակցել երկարատև խաղաղություն հաստատելու ազնիվ առաքելությանը. պատիվ, որը տրվում է նրանց, ովքեր ցուցաբերում են առաջնորդություն և զգալի ներդրում են ունենում ապագա սերունդների անվտանգության և բարգավաճման գործում։ Մենք անհամբեր սպասում ենք մոտ ապագայում հանդիպում անցկացնելու մեր հրաշալի և նվիրված գործընկերների հետ, որոնցից շատերը բարձր հարգանքի արժանացած համաշխարհային առաջնորդներ են», – գրել է Թրամփը։
