Վրաստանն ակտիվորեն աշխատում է Ադրբեջանի և Հայաստանի հետ համատեղ մաքսային անցակետերի նախագծերի շուրջ. Կոբախիձե
Վրաստանն ակտիվորեն աշխատում է Ադրբեջանի և Հայաստանի հետ համատեղ մաքսային անցակետերի նախագծերի շուրջ․ հայտարարել է վարչապետ Իրակլի Կոբախիձեն Միջազգային մաքսային օրվան նվիրված միջոցառման ժամանակ։
Նա նշել է, որ այս նախագծերը տարածաշրջանային համագործակցության հաջող օրինակ են և նպաստում են երկրի տարանցիկ և լոգիստիկ ներուժի հետագա ընդլայնմանը։
«Ասիական զարգացման բանկի աջակցությամբ ակտիվորեն աշխատանքներ են տարվում Ադրբեջանի և Հայաստանի հետ համատեղ մաքսային անցակետերի նախագծերի շուրջ։ Սա տարածաշրջանային համագործակցության փայլուն օրինակ է»,- նշել է վրացական կառավարության ղեկավարը։
Կոբախիձեն նաև ընդգծել է, որ Վրաստանը հաջողությամբ ներդրել է Եվրամիության համակարգերի հետ համատեղելի նոր համակարգչային տարանցիկ համակարգ։ Միասնական հայտարարագրի և միասնական երաշխիքի շնորհիվ այն ապահովում է ապրանքների անխափան տեղաշարժը ԵՄ-ի ներսում և այս հարթակի 39 անդամ պետությունների միջև։
Վարչապետը հավելել է, որ Արևելք-Արևմուտք արագընթաց մայրուղու, Բաքու-Թբիլիսի-Կարս երկաթուղու, չոր նավահանգիստների և Անակլիայի խորջրյա նավահանգստի նախագծի կառուցումը նպատակ ունի ամրապնդել Վրաստանի դերը Միջին միջանցքի զարգացման գործում։
