Թրամփի վարչակազմը պետք է գործի՝ ՀՀ իշխանությունների կողմից Եկեղեցու նկատմամբ աճող ճնշումների ֆոնին․ The Catholic World Report

Մարդու իրավունքների միջազգային պաշտպանները կոչ են արել Թրամփի վարչակազմին զգուշացնել Հայաստանի կառավարությանը չգնալ ավտորիտարիզմի ճանապարհով՝ Հայ առաքելական եկեղեցու նկատմամբ ճնշման աճի ֆոնին․ գրում է The Catholic World Report-ը։

«Իրականությունն այն է, որ Կառավարության կողմից Հայ առաքելական եկեղեցու դեմ արշավը շարունակվում է ավելի քան մեկ տարի», – նշել է արգենտինացի իրավաբան և քաղաքական գործիչ Ալբերտո Ֆերնանդեսը փետրվարի 26-ին Կապիտոլիումի բլրի վրա Ազգային պաշտպանության դաշինքի կազմակերպած քննարկման ժամանակ։

Նա Ամենայն հայոց կաթողիկոսին Ավստրիա մեկնելու արգելքը որակել է որպես «ինչ-որ բան, որը պետք է մեր շատ ավելի մեծ ուշադրությանն արժանանա»։ Ֆերնանդեսը կոչ է արել Փաշինյանի կառավարությանը դադարեցնել Առաքելական եկեղեցու դեմ իր արշավը՝ ընդգծելով. «Նրանք չեն կարող ասել, որ ուզում են լինել լիբերալ Արևմուտքի մաս, ուզում են լինել ամերիկամետ և միաժամանակ ընդօրինակել Էրդողանի կամ Ասադի ռեժիմի, կամ ցանկացած բռնապետի չափանիշները»։

Ֆերնանդեսը զգուշացրել է, որ Փաշինյանի նման մոտեցումն Առաքելական եկեղեցու նկատմամբ «վտանգ է ռեժիմի և կառավարության համար»։ «Եկեղեցուն կամ կրոնական մարմիններին տրված ազատության և խոսքի ու խղճի այլ ազատությունների միջև կա հստակ, ուղղակի կապ։ Ես չգիտեմ որևէ իրավիճակ, երբ ռեժիմը հետապնդում է կրոնական մարմիններին, ապա շրջվում և բաց ընդունում է աշխարհիկ քննադատությունը, քաղաքական քննադատությունը»,- ասել է նա։

 «Ռեժիմները, որոնք չեն ցանկանում լսել քննադատություն կրոնական իշխանություններից, հակված են նաև չլսել քննադատություն լրատվամիջոցներից կամ աշխարհիկ քննադատներից»,- հավելել է Ֆերնանդեսը։

Քրիստոնեական համերաշխության միջազգային կազմակերպության նախագահ Ջոն Էյբները կոչ է արել Թրամփի վարչակազմին «ցույց տալ ուժ և համոզմունք՝ պաշտպանելով Հայ առաքելական եկեղեցին այս հետապնդումից, այդպիսով՝ ամրապնդելով աշխարհի առաջին քրիստոնյա ազգի գոյատևումը»։ Նա նշել է, որ Հայաստանը գտնվում է «շատ խոցելի իրավիճակում»։

Էյբների խոսքով՝ ընտրություններին ընդառաջ՝ Փաշինյանը ներկայանում է որպես «խաղաղության մարդ» և հայտարարում․ «Եթե դուք ինձ հետ չլինեք, պատերազմի կբախվեք»։ Սա, ըստ նրա, մասամբ պայմանավորված է Փաշինյանի ներգրավվածությամբ Թրամփի կողմից աջակցվող խաղաղության ծրագրում։

Էյբները հավելել է, որ Փաշինյանը շատ վստահ է զգում, քանի որ նրա վերընտրությունը հաստատվել է հենց Վենսի կողմից, ինչը ցույց է տալիս, որ Միացյալ Նահանգները նրա կողքին է։

«Եվրամիությունը գումար է ծախսում նրա վերընտրությանն աջակցելու համար՝ ռուսական ապատեղեկատվության դեմ պայքարի անվան տակ, բայց դա, իհարկե, նրա քարոզարշավին աջակցելու համար է», – նշել է նա՝ հավելելով, որ և՛ Թուրքիան, և՛ Ադրբեջանը «սպառնում են պատերազմով» և «Փաշինյանին տեսնում են որպես իրենց մարդ»։

«Նա իրեն ներկայացնում է որպես խաղաղության միակ այլընտրանք կամ միակ հնարավորություն, և սա նկատելի է նաև հայ հանրության մոտ։ Մի կողմից՝ նրանք ցանկանում են պահպանել իրենց ազգային ավանդույթները, իրենց եկեղեցին, իրենց սահմանները, իրենց ինքնավարությունը։ Բայց նրանց սպառնում են պատերազմով», – նշել է Էյբները՝ հավելելով, որ Միացյալ Նահանգների և Հայաստանի համար իրական հարցն այն է, թե կա՞ն արդյոք երաշխիքներ, որոնք կարող են տրամադրվել՝ ապահովելու համար, որ ժամանակին ստորագրված ցանկացած փաստաթուղթ իրականում կպահպանվի։