Փաշինյանն ու Ալիևը հույս ունեն, որ Խամենեիին ուղղված իրենց շնորհավորանքները չեն առաջացնի տարակուսանք Սպիտակ տանը․ Eurasianet

Ձգտելով պահպանել լավ հարաբերություններ Թեհրանի հետ՝ Հայաստանն ու Ադրբեջանը ողջունել են Մոջթաբա Խամենեիի՝ Իրանի գերագույն հոգևոր առաջնորդի պաշտոնում ընտրվելը։ Երևանի և Բաքվի շնորհավորական նամակներն ընդգծում են այն նուրբ աշխարհաքաղաքական հավասարակշռությունը, որը երկուսն էլ փորձում են պահպանել ԱՄՆ-ի և Իսրայելի կողմից իսլամական հանրապետության փլուզմանն ուղղված ռազմական արշավի ֆոնին․ գրում է Eurasianet-ը։

Ե՛վ Հայաստանը, և՛ Ադրբեջանը սահմանակից են Իրանին։ Միևնույն ժամանակ՝ երկուսն էլ մեծ ներդրում ունեն ԱՄՆ-ի կողմից աջակցվող առևտրային միջանցքի զարգացման գործում, որը հայտնի է որպես TRIPP կամ «Թրամփի ուղի՝ հանուն միջազգային խաղաղության և բարգավաճման»։

Այս պայմաններում թե՛ Հայաստանի վարչապետ Նիկոլ Փաշինյանը, թե՛ Ադրբեջանի նախագահ Իլհամ Ալիևը հստակորեն հույս ունեն, որ Խամենեիին ուղղված իրենց շնորհավորանքները չեն առաջացնի տարակուսանք Սպիտակ տանը։

Ըստ Eurasianet-ի՝ մինչ այժմ Փաշինյանին ու Ալիևին, կարծես, հաջողվել է հարցերը զգուշորեն լուծել դիվանագիտության միջոցով՝ հաշվի առնելով, որ Վաշինգտոնից դեռևս որևէ բացասական արձագանք չի եղել նրանց գործողությունների վերաբերյալ։ Միևնույն ժամանակ, Թրամփը Fox News հեռուստաալիքին ասել է, որ ընդհանուր առմամբ «դժգոհ» է Խամենեիի ընտրությունից։