Հայ-թուրքական սահմանի բացումը մինչև հունիսին կայանալիք ընտրությունները մեծ հաղթանակ կլինի Փաշինյանի համար․ Deutsche Welle
ՀՀ-ի և Թուրքիայի հարաբերություններում 2022 թվականից ի վեր զգուշավոր մերձեցում է ընթանում։ Հայաստանն այլևս չի պնդում, որ Անկարան 1915 թվականի դեպքերը ճանաչի որպես ցեղասպանություն։
Անցյալ տարի Հայաստանը խաղաղության համաձայնագիր է նախաստորագրել Ադրբեջանի հետ, որը վերջ է դրել Լեռնային Ղարաբաղի շուրջ տասնամյակներ տևած պատերազմին։ Այդ ժամանակվանից ի վեր թուրքական ընկերությունները տարածաշրջանում հարաբերությունների կարգավորման և Հայաստանի հետ սահմանի բացման հույս ունեն․ գրում է Deutsche Welle-ն։
Թուրքիայից դեպի Հայաստան կա 2 սահմանային անցակետ, որոնք փակ են եղել Լեռնային Ղարաբաղի առաջին պատերազմից ի վեր, բայց դիտորդների կարծիքով՝ դրանք կարող են վերաբացվել մի քանի ամսվա ընթացքում։ Եթե անցակետերը բացվեն մինչև հունիսին կայանալիք Հայաստանի խորհրդարանական ընտրությունները, դա մեծ հաղթանակ կլինի վարչապետ Փաշինյանի համար։
Թուրք-հայկական գործարարության զարգացման խորհրդի ղեկավար Քաան Սոյակը նշում է, որ փակ սահմանի պատճառով երկու երկրները տարիներ շարունակ ստիպված են եղել անուղղակի առևտուր իրականացնել։ Նրա խոսքով՝ մոտ 300-350 միլիոն ԱՄՆ դոլար արժողությամբ առևտուրն անցնում է Վրաստանի միջով։ Նրա վիճակագրությունը ցույց է տալիս, որ դրա մոտ 99%-ը կազմում են Թուրքիայից Վրաստան, ապա Հայաստան տեղափոխվող ապրանքները։
Սոյակը վստահ է, որ սահմանի բացման դեպքում երկկողմ առևտրի ծավալը կարող է արագ աճել մինչև 1 միլիարդ դոլար։ Նա նաև կանխատեսում է լոգիստիկ միջանցքների արագ կառուցում, այդ թվում՝ էներգետիկ և հեռահաղորդակցության գծեր, որոնք ուղղակիորեն կկապվեն ամբողջ Կովկասի հետ։ Սակայն Իրանի պատերազմը հետաձգել է հաշվարկը։ Սոյակի խոսքով՝ պատերազմի ընդլայնումը դեպի Պարսից ծոցի երկրներ, Իրաք և Լիբանան, առաջացրել է միգրացիայի նոր ալիքի վախեր։ Հետևաբար՝ Հայաստանի և Թուրքիայի միջև ցամաքային սահմանը բացելու ծրագրերի առաջընթացը դանդաղել է։
Կարսի առևտրաարդյունաբերական պալատի ղեկավար Քադիր Բոզանը նույնպես ընդգծում է «Թրամփի երթուղու» կարևորությունը։ Նրա կազմակերպության անդամներն այս երթուղին և դրա հետ կապված ենթակառուցվածքները համարում են չափազանց կարևոր։
