Հայաստանում 2023 թվականին փախստականի կարգավիճակ է ստացել Թուրքիայի 7 քաղաքացի

Հայաստանում 2023 թվականին կացության կարգավիճակ է շնորհվել 8761 անձի, այդ թվում ԱՊՀ երկրների 3658, ԵՄ պետությունների՝ 266 քաղաքացու․ այս մասին հայտնում է ՀՀ վիճակագրական կոմիտեն:

Ընդ որում՝ 5073 հոգի ստացել է ժամանակավոր, 3274-ը՝ մշտական, 414-ը՝ հատուկ կացության կարգավիճակ: Կարգավիճակ ստացածների թվում գերակայում են Ռուսաստանի և Հնդկաստանի քաղաքացիները, համապատասխանաբար 3350 և 2035 հոգի: Ռուսաստանցիներից մշտական կացության կարգավիճակ է ստացել 2137, իսկ Հնդկաստանի բնակիչներից՝ 41 մարդ:

2023 թվականի երկրորդ կիսամյակում Հայաստանում ապաստան է հայցել տարբեր երկրների 370 քաղաքացի, որոնցից 193-ին (14 երկրների քաղաքացիների և անհայտ քաղաքացիությամբ մեկ անձի) շնորհվել է փախստականի կարգավիճակ: Այն ստացողներից 94-ը Ուկրաինայի, 28-ը՝ Հայիթիի, 17-ը՝ Իրաքի, 16-ը՝ Սիրիայի, 11-ը՝ Իրանի, 7-ը՝ Թուրքիայի և 6-ը՝ Եմենի քաղաքացիներ են: Գերակշռել են 35-64 տարեկանները: Ապաստան հայցածների մեծամասնությունը եղել են Իրաքի (109), Ուկրաինայի (91), Իրանի (57), Եգիպտոսի (42), Ռուսաստանի (13) և Թուրքիայի (9) քաղաքացիներ:

Նույն ժամանակահատվածում 35 հոգու նկատմամբ կայացվել է փախստականի կարգավիճակը դադարեցնելու որոշում: Կասեցվել կամ կարճվել է ապաստանի վերաբերյալ 187 անձի 98 դիմում: