Այն տնտեսական ու ֆինանասական գործընթացները, որոնք զարգացել են 2018 թվականից հետո, հայկական ծագում չունեն։ Դրանք հիմնականում կապված էին աշխարհաքաղաքական զարգացումների հետ, առաջին հերքին ռուս-ուկրաինական հակամարտության հետ․ այս մասին լրագրողների հետ ճեպազրույցում ասել է ՀՀԿ -ական նախկին պատգամավոր, տնտեսագետ Գագիկ Մինասյանը։
«Այն «ներարկումները», որոնք ունեցանք, մեր տնտեսության հետ կապ չուներ։ Հիմա ջրի բերածը, ջուրն էլ տանում է։ Մենք պետք է համակերպվենք այն իրողության հետ, որ այս տարիների ընթացքում տնտեսության իրական հատվածի զարգացման համար գործող իշխանությունը ոչինչ չի արել։ Մենք պետք է նաև ընկալենք, որ առաջիկայում տնտեսական աճին նպաստող գործընթացները դադարելուց հետո կանգնելու ենք կոտրած տաշտակի առաջ»,- ասել է Մինասյանը։
Խոսելով Հայաստանում գործող բանկային համակարգից՝ Մինասյանը նշել է, որ ի տարբերություն հետխորհրդային մյուս երկրների, Հայաստանը շատ ավելի զարգացած ու կազմակերպված է եղել։
«Երկրում գործող հակատրամաբանական, հակատնտեսագիտական ասպատակումների դեպքում էլ մեր բանկային համակարգը մնաց բարձր մակարդակի վրա, քանի որ 30 տարիների ընթացքում ամուր հիմքեր է ձեռք բերել»,- ընդգծել է Մինասյանը։
Հիշեցնենք, որ փետրվարի 6-ին «Արդշինբանկ» բանկը հայտարարել է, որ ձեռք է բերել HSBC-Հայաստանը։ Լուրեր են շրջանառվում նաև «Ամերիաբանկի» բաժնետոմսերը Georgian bank-ին վաճառելու մասին։