Սոցիալական բնակարաններ կտրամադրվեն Արցախից բռնի տեղահանված այն անձանց, ովքեր օբյեկտիվորեն հնարավորություն չեն ունենա օգտվել բնակարաններ գնելու կամ կառուցելու ծրագրային աջակցությունից։ Այսօր Ազգային ժողովում կառավարության 2023 թվականի կատարողականի ներկայացման ժամանակ հայտնել է ՀՀ փոխվարչապետ Տիգրան Խաչատրյանը։ Նա ներկայացրել է աջակցության այն ծրագրերը, որոնք նախորդ տարվա հոկտեմբերից մշակվել և իրականացվել են Արցախից բռնի տեղահանված մեր հայրենակիցների համար։
Նրա խոսքով՝ 2024 թվականի մարտի 31-ի դրությամբ՝ 100 հազարական դրամների աջակցության ծրագրից օգտվել է 113400 մարդ, իսկ ծրագրի բյուջեն կազմել է 11 միլիարդ 400 միլիոն դրամ։ «40+10 հազարական դրամ» աջակցության ծրագրի 6 ամիսների բյուջեն կազմել է 30 միլիարդ դրամ։
«Շուտով կառավարությունը կհաստատի Արցախի բռնի տեղահանված մեր հայրենակիցների համար բնակարանային աջակցության երկարաժամկետ ծրագիրը, որը բռնի տեղահանվածների համար նախատեսում է 3-5 միլիոն դրամի աջակցություն՝ տուն գնելու կամ կառուցելու նպատակով։ Աջակցության շահառու կլինեն մեր այն հայրենակիցները, ովքեր Հայաստանում կհաստատեն երկարատև բնակություն։ Որպես չափորոշիչ կսահմանվի ՀՀ քաղաքացի դառնալու հանգամանքը,-հայտնել է Խաչատրյանը։
Մեկ մարդու հաշվով 3 մլն դրամ կլինի աջակցության նվազագույն չափը, իսկ եթե շահառու ընտանիքը որոշի բնակարան գնել կամ կառուցել կառավարության կողմից որոշված բնակավայրերում, մեկ մարդու հաշվով աջակցությունը կավելանա մինչև 4 կամ 5 միլիոն դրամ։
«Այց ցանկում ընդգրկվելու են մարզային այն բնակավայրերը, որտեղ կառավարությունն իրականացնում է սոցիալական ենթակառուցվածքների զարգացմանն ուղղված ներդրումներ՝ որակյալ կրթական, առողջապահական և այլ անհրաժեշտ ծառայություններ ապահովելու նպատակով»,- նշել է Խաչատրյանը։
Գումարի մի մասը շահառուները կարող են օգտագործել հողամասի գնման, տունը վերանորոգելու, գույք ձեռք բերելու համար և այլն։ Այն ընտանիքները, ովքեր նշված բնակարաններում կբնակվեն 10 տարի, կստանան իրենց բնակարանների նկատմամբ սեփականության իրավունք։
Փոխվարչապետը հիշեցրել է, որ ծրագիրն իրականացվելու է փուլային տարբերակով։ Առաջին տարում աջակցություն կստանան այն ընտանիքները, որոնց կազմում կան 3 և ավելի անչափահաս երեխաներ, կամ եթե ընտանիքում կա առնվազն 1 անչափահաս երեխա և միաժամանակ 1-ին կամ 2-րդ կարգի հաշմանդամություն ունեցող անձ։ Երկրորդ փուլում աջակցություն կստանան 2 անչափահաս երեխաներ ունեցող ընտանիքները, և այսպես շարունակ։