Կոպիրկինին հետ կանչելը սիմվոլիկ քայլ էր, ցանկանում են ցույց տալ, որ խնդիր կա․ Թևան Պողոսյան
Հայաստանում ՌԴ դեսպան Սերգեյ Կոպիրկինի՝ խորհրդակցությունների նպատակով Մոսկվա կանչելը ցուցադրական ժեստ է․ ABC media-ի հետ զրույցում ասել է քաղաքագետ Թևան Պողոսյանը։
Նրա խոսքով՝ հավանաբար մայիսի 8-ին Պուտին-Փաշինյան հանդիպման ընթացքում ինչ-որ պայմանավորվածություն է ձեռք բերվել, ինչը չկատարելն է Կոպիրկինին հետ կանչելու պատճառը։
«Դիվանագիտական լեզվով սա նշանակում է, որ երկու շաբաթվա մեջ ինչ-որ բաներ պետք է կատարվեր, ինչը չի կատարվել։ Դեսպանին կոնսուլտացիաների համար հետ կանչելը սիմվոլիզմ է պարունակում, ցանկանում են ցուցադրաբար ներկայացնել, որ կա խնդիր։ Դա էլ է դիվանագիտական լեզվի գործիք։ Վստահ եմ, որ Մոսկվայում գիտեն Կոպիրկինի համարը, եթե կոնկրետ հարց պետք լիներ քննարկել, ցուցադրաբար չէին ասի հետ ենք կանչում»,-ասել է Պողոսյանը։
Քաղաքագետի խոսքով՝ պետք է տեղի ունեցածի պատճառը փնտրել այն հայտարարությունների մեջ, որ 2020-ի պատերազմին երկրորդ երկիր էլ է մասնակցել։
«Մենք տեսել ենք չէ՞, որ այս մի քանի ամիսներին մի քանի անգամ նմանատիպ իրավիճակներ տեղի են ունեցել, Թուրքիան իր դեսպանին հետ է կանչել Իսրայելից, Ֆրանսիան՝ Ադրբեջանից և այլն։ Թեման եղել է դիվանագիտական հարաբերություններում պայմանավորվածությունները չկատարելը և դիվանագիտական գործիքակազմի մեջ ցուցադրական քայլի գնալը։ Ցանկացած կոնսուլտացիա կարելի է հեռախոսով էլ անել, սոցցանցերով, տեսակապով, անգամ միջազգային ժողովներն են տեսակապով արվում։ Դիվանագիտական գործիքակազմի մեջ այս երևույթը հատուկ ցուցադրական մեսիջ է՝ ինչ-որ բանի մասին»,-ասել է Պողոսյանը։
