Ամենամեծ նախկինը դու դարձար` քո ժողովրդի դեմ այդքան ոստիկան հանելու պատճառով նաև. Սրբազան
Բագրատ Սրբազանը Սուրբ Աննա եկեղեցու բակում քաղաքացիների հետ քննարկում է առավոտից հանրապետությունում մեկնարկած խաղաղ անհնազանդության ակցիաներն ու ոստիկանական բիրտ ուժի կիրառման դեպքերը։
«Ամոթ էլ է ասել՝ Մանե Թանդիլյանին են գետնին տապալել։ Մեր աղջիկներին, տղաներին գողանալով, հարձակվելով նրանց վրա՝ հատուկ գործողություններ են անում։ Ոչ մի բանով այս շարժումը չեք կարող կասեցնել, մենք հանդարտ անելու ենք այն, ինչը դուք չգիտեք՝ ինչ է լինելու։ Ոստիկանների մեջ էլ մարդիկ կան, որոնք չեն ուզում այս ամենն անել ու ցույց են տալիս դա»,- հայտարարեց Բագրատ Սրբազանը։
Նա նաև անդրադարձել է բերման ենթարկվելիս տարբեր վնասվածքներ ստացած քաղաքացիներին։
«Երգիչ Արսեն Գրիգորյանն է հիվանդանոցում, մի հոգու «Գրիգոր Լուսավորիչ» ԲԿ են տարել, ես չեմ հասցնի, բայց խնդրում եմ իմացեք՝ ով է, այցելեք։ Առավոտ ութից Երևանում ման եմ եկել, փակ էին բոլոր փողոցները։ Սիսիանում գազ են փչել մարդկանց վրա, առողջությանը վնաս են պատճառել ու դրա համար պիտի պատասխան տան»,- ասաց նա։
Սրբազանը նաև դիմեց Նիկոլ Փաշինյանին․
«Ամենամեծ նախկինը դու դարձար, քո ժողովրդի դեմ այդքան ոստիկան հանելու պատճառով նաև։ Այդ տղաներն էլ են մեղք, մինչև վերջ փչացրել եք։ Արամ Հովհաննիսյանը՝ մեծ փորով, ներկայացնում է ոստիկանական համակարգը։ Աշխարհում նման տիպով ոստիկանապետ գոյություն չունի, զինվորներդ ի՞նչ պիտի սովորեն քեզնից, քո ֆիզիկական ներկայությունն արդեն ասում է ամեն ինչի մասին, ցույց է տալիս՝ ինչ ես կերել. այդքանից հետո գալիս ինձ ասում ես` տեր հայր, մարդկանց՝ լակոտ։ Եթե ասելիք ունես, կողքովդ անցել եմ, մի բառ շշնջայիր»,- ասաց Սրբազանը։
«Այս մարդը գնալու է, չի մնալու։ Դուք եք թելադրել այդ խաղի կանոնները, դուք էլ կստանաք, խնդիր չկա։ Մենք ոստիկանների հետ խնդիր չունենք, բայց դուք եք ուզում այդպես լինի։ Մենք խնդիր չունենք այն ոստիկանների հետ, որոնք մտածում են իրենց հայրենիքի մասին»,- հայտարարեց Սրբազանը:
