Հայաստանն այլ գործընկերներ գտնելու իրավունք ունի, բայց Ռուսաստանի հետ համագործակցությանը այլընտրանք չկա. Զատուլին
Հայաստանն իրավունք ունի փնտրել այլ գործընկերներ, սակայն մոտ ապագայում Ռուսաստանի հետ բարեկամությունն ու համագործակցությունն այլընտրանք չունի: Նման կարծիք է հայտնել ՌԴ Պետդումայի ԱՊՀ գործերի և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինը․ գրում է Интерфакс գործակալությունը։
“Ես համոզված եմ, որ տեսանելի ապագայում ոչ ոք չի կարող հայերի, հայ ժողովրդի համար փոխարինել Ռուսաստանի Դաշնության հետ հարաբերությունները։ Ընդ որում, վստահ եմ, որ Հայաստանը, հայերն իրավունք ունեն, և նրանք այն իրագործում են, կապ հաստատելու ամբողջ աշխարհի հետ, աջակցություն փնտրելու ցանկացած վայրում”, – ասել Է խորհրդարանականը հինգշաբթի օրը Մոսկվայի Լազարևյան ակումբում «Ո՞ւր ես գնում․ Հայաստանի խաչի և Ռուսաստանի խաչի մասին» թեմայով նիստի ժամանակ։
Անդրադառնալով այն մեղադրանքներին, թե Ռուսաստանն է պատասխանատու Ադրբեջանի հետ դիմակայությունում Հայաստանի պարտության, այն ծանր ռազմաքաղաքական իրավիճակի համար, որում հայտնվել է հանրապետությունը, Զատուլինը դա անվանել է «ակնհայտ սուտ»։
«Կարծում եմ, որ կատարվածի համար Ռուսաստանի վրա ամբողջ մեղքը բարդելու փորձերը շարունակությունն են այն մտքի, որը նախապես ասված էր ներկայիս վարչապետի և նրա համախոհների քաղաքական կարիերայի սկզբում՝ Ռուսաստանի հետ հարաբերությունները խզելու անհրաժեշտության, Ռուսաստանը տասնյակ և հարյուրավոր տարիներ որպես պաշտպան և հովանավոր դիտարկող հայ ժողովրդի գիտակցությունը վերակողմնորոշելու, վերաձևակերպելու անհրաժեշտության մասին»,- ասել է Պետդումայի պատգամավորը։
