Ապաշրջափակումը պետք է տեղի ունենա Հայաստանի ինքնիշխանության ներքո․ Իրանի դեսպան

Իրանը կողմնակից է ապաշրջափակմանը, սակայն դա պետք է տեղի ունենա Հայաստանի ինքնիշխանության ներքո․ լրագրողների հետ զրույցում ասել է Հայաստանում Իրանի դեսպան Մեհդի Սոբհանին:

«Մեր դիրքորոշումը ապաշրջափակման մասին շատ հստակ է` մենք կողմնակից ենք ապաշրջափակմանը, սակայն ապաշրջափակումը պետք է տեղի ունենա Հայաստանի ինքնիշխանության ներքո»,- նշել է դիվանագետը:

Հարցին, թե ապաշրջափակման հետաձգումն ի՞նչ հետևանքներ կբերի` դեսպանն արձագանքել է. «Բնական է, եթե տեղի է ունենում ապաշրջափակում, դրա արդյունքում երթևեկությունն է մեծանում, բայց պետք է փոխադարձ պայմանավորվածություն և համաձայնություն լինի այդ մասով։ Եթե պայմանավորվածություն է լինում, դա նշանակում է՝ ավելի ենք մոտենում խաղաղությանը։ Սա տարածաշրջանի օգտին է, տարածաշրջանի ժողովուրդների օգտին է։ Այն, ինչ իրականացվում է կայուն խաղաղության հաստատման ուղղությամբ, մենք դրա կողմնակիցն ենք»,- հավելել է Սոբհանին։