Պաղեստինում տեղի ունեցող իրադարձությունները Ռուսաստանի կողմից աննկատ չեն մնում․ Պուտինը՝ Պաղեստինի նախագահին
Չնայած հատուկ ռազմական գործողություն վարելու անհրաժեշտությանը, Պաղեստինում տեղի ունեցող իրադարձությունները աննկատ չեն մնում Ռուսաստանի կողմից․ այս մասին, ТАСС-ի փոխանցմամբ, հայտարարել է ՌԴ նախագահ Վլադիմիր Պուտինը Պաղեստինի նախագահ Մահմուդ Աբասի հետ բանակցություններում։
Բանակցությունների սկզբում Ռուսաստանի ղեկավարը ջերմորեն ողջունել է Պաղեստինի նախագահ Մահմուդ Աբասին։
«Մենք իրար չենք տեսել երկու տարի, թեև անընդհատ կապի մեջ ենք, և ես շատ ուրախ եմ տեսնել Ձեզ և ձեր պատվիրակությանը», – ընդգծել է Պուտինը։
«Բոլորին է հայտնի, որ Ռուսաստանն այսօր, ցավոք, պետք է պաշտպանի իր շահերը, պաշտպանի իր ժողովրդին զենքը ձեռքին, բայց այն, ինչ կատարվում է Մերձավոր Արևելքում, այն, ինչ կատարվում է Պաղեստինում, իհարկե, աննկատ չի մնում մեր կողմից»-, ասել է ՌԴ նախագահը։
Պուտինն ընդգծել է, որ Ռուսաստանի Դաշնությունը երկարամյա և խորը կապեր ունի արաբական աշխարհի և մասնավորապես Պաղեստինի հետ, ինչը Մոսկվան շատ է գնահատում։
«Ես շատ ուրախ եմ, որ հնարավորություն ունեմ այսօր հանդիպել ձեզ հետ այստեղ՝ Մոսկվայում և խոսել մեր հարաբերությունների ողջ համալիրի, ներկա իրավիճակի, ինչպես նաև մոտ ապագայի մասին»,- ասել է ՌԴ նախագահը։
«Մենք ձեզ հետ ընդհանուր դիրքորոշում ունենք այն մասին, որ տվյալ խնդրի արմատները գալիս են հեռավոր անցյալից և կապված են նախկինում միջազգային կազմակերպությունների, առաջին հերթին ՄԱԿ-ի մակարդակով ընդունված որոշումների անտեսման հետ` կապված անկախ պաղեստինյան պետության ստեղծման հետ», – ասել է նա:
ՌԴ նախագահն ընդգծել է, որ ՌԴ դիրքորոշումն այս հարցում «անփոփոխ է»:
«Այն վաղուց է ձևակերպված և ինչ-որ իրավիճակային բնույթ չի կրում։ Մենք կարծում ենք, որ տարածաշրջանում երկարատև, հուսալի, կայուն խաղաղություն ապահովելու համար անհրաժեշտ է կատարել ՄԱԿ-ի բոլոր որոշումները և, առաջին հերթին, ստեղծել լիարժեք պաղեստինյան պետություն», – ասել է Ռուսաստանի նախագահը:
