Ուզբեկստանի նախագահ Շավքաթ Միրզիյոևի հրավերով Ադրբեջանի նախագահ Իլհամ Ալիևն օգոստոսի 22-23-ը պետական այցով կմեկնի Ուզբեկստան. այս մասին հայտնել է ТАСС-ը, հղում անելով Ուզբեկստանի ղեկավարի մամուլի ծառայությանը։
Տաշքենդում նախատեսված են բարձր մակարդակի բանակցություններ, նաև Ալիևի և Միրզոյոևի նախագահությամբ տեղի կունենա Գերագույն միջպետական խորհրդի առաջին նիստը, օրակարգում ռազմավարական գործընկերության և բազմակողմ գործակցության խորացման և ընդլայնման հարցեր են։ Ուշադրության կենտրոնում են լինելու նաև փոխադարձ առևտրաշրջանառության ավելացմանը, գործարար կապերի զարգացմանը մշակութային և հումանիտար կապերի ակտիվացմանն առնչվող հարցեր։
Նախագահները համատեղ հանդիպում կանցկացնեն երկու երկրների բիզնեսի ներկայացուցիչների հետ, կմասնակցեն գործարար ու մշակութային միջոցառումներին, հավելել են մամուլի ծառայությունից։
2022-ի հունիսին Ադրբեջանի և Ուզբեկստանի նախագահները երկու երկրների միջև ռազմավարական գործընկերության խորացման մասին հռչակագիր են ստորագրել՝ պայմանավորվելով խորացնել գործակցությունը մի շարք առանցքային ոլորտներում, այդ թվում՝ ռազմական։
