Սեպտեմբերի 11-ին Ստրասբուրգում Նախարարների խորհրդի նիստից հետո ԵԽ-ում ԵՄ պատվիրակությունը հայտարարություն է ընդունել, որում նշվել է. «ԵՄ-ն ի գիտություն է ընդունում Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեի (CPT) 114-րդ լիագումար նիստում (2024 թ. հուլիս) Ադրբեջանի վերաբերյալ ընդունված հրապարակային հայտարարությունը: Մենք ափսոսում ենք Ադրբեջանի իշխանությունների և կոմիտեի միջև համագործակցության շարունակական բացակայության համար ու կոչ ենք անում Ադրբեջանի իշխանություններին վերսկսել կառուցողական երկխոսությունը կոմիտեի հետ:
Մենք կոչ ենք անում Ադրբեջանի իշխանություններին՝ լուծել Կոմիտեի հայտարարության մեջ բարձրացված հարցերը՝ իրենց միջազգային պարտավորություններին համապատասխան, ներառյալ այն, որին անդամակցել է Ադրբեջանը՝ որպես Եվրոպայի խորհրդի անդամ։
ԵՄ-ն անհանգստացած է Ադրբեջանում տեղի ունեցած վերջին ձերբակալություններով, որոնք ավելացնում են անցյալ տարվանից անկախ լրագրողների, իրավապաշտպանների և քաղաքացիական հասարակության ներկայացուցիչների ձերբակալությունների մտահոգիչ միտումը:
Մենք կոչ ենք անում Ադրբեջանին ապահովել թափանցիկություն և պատշաճ ընթացակարգ, ինչպես նաև արժանապատիվ և անվտանգ պայմաններ բոլոր կալանավորների համար, ներառյալ լիարժեք հասանելիությունը բժշկական և անկախ իրավաբանական ծառայություններին, ինչպես նաև լուծել խոշտանգումների և անմարդկային կամ նվաստացնող վերաբերմունքի կամ պատժի հետ կապված լուրջ խնդիրները:
Եվրամիությունը հանձնառու է շարունակել երկխոսությունը Ադրբեջանի հետ մեր համագործակցության բոլոր առանցքային ոլորտներում՝ ներառյալ մարդու իրավունքները և օրենքի գերակայությունը՝ մեր ընդհանուր միջազգային պարտավորություններին համապատասխան», – նշվել է հայտարարության մեջ:
