Էվերեստի լանջերին հայտնաբերվել են 1924 թվականին անհետացած ալպինիստ Էնդրյու Իրվինի մասունքները։ Բացահայտումն իրականացրել է National Geographic-ի նկարահանող խումբը, որը վավերագրական ֆիլմ էր պատրաստում Էվերեստի մասին։
1924 թվականին դեռ ոչ ոք չէր նվաճել Էվերեստի գագաթը, և վերելքները չափազանց հազվադեպ էին։ Մեծ Բրիտանիայում Իրվինը և նրա ուղեկիցները համարվում էին ազգային հերոսներ, իսկ նրանց անհետացումը ցնցեց հասարակությանը։ Հաջորդող արշավախմբերը փորձեցին գտնել նրանց հետքերը, սակայն երկար տարիներ բոլոր ջանքերն ապարդյուն էին։
National Geographic-ի երթուղին անցնում էր Ռոնգբուկ սառցադաշտով՝ այն նույն ճանապարհով, որով 1924 թվականին բարձրացել էին Իրվինը և նրա ուղեկից Ջորջ Մելորին։
Վավերագրողները նախ հայտնաբերել են թթվածնային բաք՝ «1933» մակագրությամբ։ Ենթադրվում է, որ այն կորցրել են բրիտանական հաջորդ արշավախմբի անդամները, որոնք 1933 թվականին փորձել էին հետևել Մելորիի և Իրվինի հետքերով։ Նրանց նույնպես չի հաջողվել հասնել գագաթին, սակայն նրանք ապահով վերադարձել են հայրենիք։
