Հնդկաստանի մայրաքաղաքում օդի աղտոտվածության մակարդակը 50 անգամ գերազանցել է թույլատրելի նորման

Հնդկաստանի մայրաքաղաք Նյու Դելիի իշխանությունները երկուշաբթի փակել են դպրոցները, դադարեցրել շինարարությունը և արգելել են ոչ խիստ կարևորության բեռների մուտքը քաղաք, այն բանից հետո, երբ օդի աղտոտվածությունը հասել է տարվա այս ժամանակաշրջանի համար ամենաբարձր մակարդակին․ հայտնում է The Associated Press-ը։

Փոշին ծածկել է հուշարձաններն ու բարձրահարկ շենքերը․ տեսանելիությունն այնքան ցածր է, որ ավիաընկերությունները հայտարարել են չվերթների հետաձգման մասին։

Քաղաքի որոշ հատվածներում աղտոտվածության մակարդակը ավելի քան 50 անգամ գերազանցել է Առողջապահության համաշխարհային կազմակերպության սահմանած աղտոտվածության անվտանգ շեմը: Ըստ եղանակային կանխատեսումների՝ օդի աղտոտված վիճակը կշարունակվի ողջ շաբաթվա ընթացքում։