Արցախում հոսպիտալացվել է պայթյունից տուժած 290 քաղաքացի, 7-ը մահացել են, կա 13 չճանաչված մարմին

Սեպտեմբերի 25-ին Ասկերանի շրջանում վառելիքի պահեստում տեղի ունեցած
խոշոր պայթյունի հետևանքով ԱՀ ԱՆ «Հանրապետական բժշկական կենտրոն», «Արևիկ» ԲՄ, Իվանյանի
բուժական կետ և ռուս խաղաղապահների բուժկետում ընդունել են ընդհանուր առմամբ 290 հիվանդ`
տարբեր աստիճանի այրվածքներով. տեղեկացնում են ԱՀ առողջապահության նախարարությունից:

Նրանց հիմնական մասը տեղափոխվել է
«Հանրապետական բժշկական կենտրոն»։

Ցավոք սրտի, 7 հիվանդի կյանք հնարավոր
չէր փրկել և նրանք մահացել են հիվանդանոցում։

Պայթյունից տուժած տասնյակ հիվանդներ
դեռևս գտնվում են ծայրահեղ ծանր վիճակում։

13 չճանաչված մարմին տեղափոխվել է
«Դատաբժշկական փորձաքննության բյուրո»։

Բազմաթիվ անձինք անհետ կորած են համարվում, քանի որ պայթյունի հետևանքով այրվել
են և նրանց վերաբերյալ լրացուցիչ տվյալներ պետք է ճշտվեն։