ԱՄՆ հետաքննությունների դաշնային բյուրոյի տնօրեն Քրիստոֆեր Ռեյի հեռանալու օրը «մեծ օր կլինի Ամերիկայի համար»․ Թրամփ

ԱՄՆ հետաքննությունների դաշնային բյուրոյի տնօրեն Քրիստոֆեր Ռեյը կլքի իր պաշտոնը մինչև Դոնալդ Թրամփի հունվարի երդմնակալությունը, ով հասկացրել է, որ ավելի հավատարիմ թեկնածու է ցանկանում այս պաշտոնում, գրել է BBC-ին։

Ռեյը հայտարարել է իր մոտալուտ հրաժարականի մասին ՀԴԲ-ի ներքին հանդիպման ժամանակ, ինչի մասին հայտնել է CBS-ը:

Թրամփը, ով պաշտոնը ստանձնում է հունվարի 20-ին, հասկացրել է, որ ցանկանում է, որ Ռեյը ՀԴԲ-ի ղեկավարի պաշտոնում փոխարինվի Քեշ Պատելով, ով անձամբ հավատարիմ է նոր նախագահին և կիսում է հակառակորդ «խորը պետության» մասին դավադրության տեսությունները։

Պատելը նախկինում եղել է ՀԴԲ-ի կատաղի քննադատողը և կոչ է արել պաշտոնանկ անել նրա բարձրագույն ղեկավարությանը:

Հետաքննությունների դաշնային բյուրոյի տնօրենը նշանակվում է 10 տարի ժամկետով՝ ԱՄՆ նախագահի առաջարկությամբ, ով, սակայն, իրավունք ունի ցանկացած պահի պաշտոնանկ անել նրան՝ նույնիսկ առանց պատճառաբանության։ Ռեյն այս պաշտոնում նշանակվել է 2017 թվականին Թրամփի կողմից, և Բայդենի հետագա վարչակազմը չի փոխարինել նրան։

«Մի քանի շաբաթ ուշադրությամբ քննարկելուց հետո ես որոշեցի, որ բյուրոյի շահերից է բխում, որ ես ծառայեմ մինչև ընթացիկ վարչակազմի ավարտը՝ հունվարը, իսկ հետո լքեմ իմ պաշտոնը», – ասել է Ռեյը ՀԴԲ-ի նիստում:

Դիմելով գործակալության աշխատակիցներին՝ նա ընդգծել է, որ ՀԴԲ-ի նպատակը՝ «ամերիկացիներին անվտանգ պահելը և Սահմանադրությունը պաշտպանելը», կմնա անփոփոխ։

Դոնալդ Թրամփն իր Truth Social սոցիալական ցանցում գրել է, որ Ռեյի հեռանալու օրը «մեծ օր կլինի Ամերիկայի համար», և որ դա վերջ կդնի ՀԴԲ-ն գործիք դարձնելը քաղաքական հակառակորդների դեմ կառավարության պայքարում:

Պատելի թեկնածությունը պետք է հաստատի ԱՄՆ Սենատը։