Հայ-ադրբեջանական խաղաղության ուղին՝ փակուղում․ Փաշինյանի և Ալիևի տարաձայնությունները

Հայաստանում խաղաղության մասին փաստաթղթերը փակ են, իսկ Փաշինյանի հրամանով ընդդիմադիր պատգամավորներին ամիսներ առաջ արգելվել է դրանց ծանոթանալ՝ արտահոսքերը կանխելու նպատակով:

Իսկ մինչ Հայաստանում ձգտում են լռություն պահպանել ու բացահայտումներ չանել, Ադրբեջանի նախագահ Իլհամ Ալիևը շտապում է գաղտնազերծել համաձայնագրի չհամաձայնեցված կետերը՝ <Россия сегодня» միջազգային մեդիախմբի գլխավոր տնօրեն Դմիտրի Կիսելյովին տված հարցազրույցում:
«Ադրբեջանի և Հայաստանի միջև խաղաղության պայմանագրի 17 հոդվածից 15-ը համաձայնեցվել է: Չի համաձայնեցվել փոխադարձ հայցերից զերծ մնալու մասին հոդվածը, նաև մեր սահմանին կողմնակի ուժեր չտեղակայելու մասին հոդվածը: Օտարերկրյա դիտորդների անվան տակ Երևանը հայ-ադրբեջանական սահմանին տեղակայել է ՆԱՏՕ-ի ենթակառուցվածքները: Հայաստանը պետք է փոփոխություններ կատարի իր սահմանադրության մեջ, որտեղ հղում է արվում Անկախության հռչակագրին: Բացի այդ, մնում է նաև ԵԱՀԿ Մինսկի խմբի լուծարման հարցը»,-ասել է Ադրբեջանի նախագահ Իլհամ Ալիևը:

Ալիևի հարցազրույցից ընդամենը մեկ օր անց Փաշինյանը հարցազրույց տվեց Արմենպրեսս պետական լրատվական գործակալությանը: Մի քանի առանցքային կետ ենք առանձնացրել, որը հատկապես շեշտել է Փաշինյանը, ու կարմիր գծով անցկացրել:

«Կարող եմ երաշխավորել, որ Հայաստանը Ադրբեջանի վրա հարձակվելու, սադրիչ գործողություններ ծավալելու ոչ մի մտադրություն, նպատակ կամ ծրագիր չունի ու չի գնալու այդ ճանապարհով: Եթե Ադրբեջանն էլ Հայաստանի վրա հարձակվելու մտադրություն չունի, ուրեմն տարածաշրջանում էսկալացիայի հավանականությունը զրո է»- ասել է Փաշինյանը:

Հաջորդը հենց խաղաղության պայմանագրի հարցն է, ու Փաշինյանը պնդում է, թե չհամաձայնեցված երկու հոդվածի վերաբերյալ էլ արդեն մեկ ամսից ավելի առաջարկներ են փոխանցել Ադրբեջանին, որոնք դեռ անպատասխան են։