Սի Ցզինպինը և Պուտինը տեսակապով զրուցել են Թրամփի երդմնակալությունից հետո
Չինաստանի նախագահ Սի Ցզինպինը և ՌԴ նախագահ Վլադիմիր Պուտինը տեսազանգ են ունեցել երկուշաբթի՝ Դոնալդ Թրամփի երդմնակալությունից ժամեր անց՝ խոստանալով երկկողմ հարաբերությունները հասցնել «ավելի մեծ բարձունքների»․ հայտնում է BBC-ն՝ հղում անելով երկու կողմերի պետական լրատվամիջոցներին։
Չինաստանի նախագահին «սիրելի ընկեր» անվանելով՝ Պուտինը նշել է, որ Ռուսաստանն ու Չինաստանը հարաբերություններ են կառուցում «բարեկամության, փոխադարձ վստահության և աջակցության հիման վրա», չնայած արտաքին ճնշմանը։
Սի Ցզինպինը Պուտինին կոչ է արել «շարունակել խորացնել ռազմավարական համակարգումը, ամրապնդել փոխադարձ աջակցությունը և պաշտպանել օրինական շահերը»։
Երեքշաբթի Թրամփը սպառնացել է մաքսատուրքեր սահմանել Պեկինի նկատմամբ և նախազգուշացրել, որ Մոսկվային «մեծ դժվարություններ» են սպասվում, եթե նա համաձայնության չգա Ուկրաինայում պատերազմին վերջ տալու վերաբերյալ։
