Ուկրաինայում հակամարտության ավարտի չորս հնարավոր սցենար՝ ըստ The Times-ի
The Times-ի ռազմական թղթակից Էնթոնի Լոյդն իր հոդվածում ներկայացրել է Ուկրաինայում մարտերի դադարեցման չորս հնարավոր տարբերակ։
Լոյդի խոսքով՝ առաջին սցենարը Ուկրաինայի ակնհայտ ռազմական պարտությունն է, որը կարող է պայմանավորված լինել ԱՄՆ-ից ռազմական աջակցության կրճատմամբ։
Երկրորդ սցենարը՝ «վատ խաղաղությունը», ենթադրում է Ուկրաինայի կառավարության բանակցություններ Մոսկվայի հետ թույլ դիրքերից, ինչը կարող է հանգեցնել որոշ տարածքների զիջմանը։ Սա կդիտարկվի որպես Ռուսաստանի հաղթանակ և Կիևի պարտություն։
Երրորդ տարբերակն, ըստ լրագրողի, հրադադարն է։ Լոյդը նշում է, որ, չնայած այս տարբերակը կարող է հանգեցնել ապագա կայունության և անվտանգության երաշխիքների, առանց հաշտության պայմանագրի դա միայն կսառեցնի հակամարտությունը՝ վերսկսման վտանգով։
Չորրորդ սցենարը ենթադրում է Ուկրաինայի զինված առաջխաղացումը և Ռուսաստանի դեմ նոր պատժամիջոցների կիրառումը՝ Կիևին բանակցությունների ուժեղ դիրք ապահովելու համար։
Լոյդն, այդուհանդերձ, ընդունում է, որ Ուկրաինան, ամենայն հավանականությամբ, չի կարողանա վերադարձնել իր կորցրած բոլոր տարածքները։
