Բրազիլիան ԱՄՆ-ից բացատրություն է պահանջում իր քաղաքացիներին ձեռնաշղթաներով արտաքսելու համար
Բրազիլիայի կառավարությունը վրդովմունք է հայտնել այն ժամանակ, երբ ԱՄՆ-ից արտաքսված տասնյակ ներգաղթյալներ ժամանել են ձեռնաշղթաներով։ Այս իրավիճակը որակվել է որպես «աղաղակող արհամարհանք» նրանց իրավունքների հանդեպ. հաղորդում է AFP-ն։
Բրազիլիայի արտաքին գործերի նախարարությունը հայտարարել է, որ Վաշինգտոնից պահանջում է բացատրություն «նվաստացուցիչ վերաբերմունքի» համար, որին ենթարկվել են ուղևորները։
Դեպքը զուգադիպել է ԱՄՆ նախկին նախագահ Դոնալդ Թրամփի՝ իշխանություն վերադառնալու հետ, ով հայտնի է իր կոշտ հակամիգրացիոն քաղաքականությամբ՝ ուղղված անօրինական միգրացիայի դեմ պայքարին և զանգվածային արտաքսումներին։
Ինքնաթիռի վայրէջքից հետո Մանաուս քաղաքի իշխանությունները հրահանգել են ԱՄՆ ներկայացուցիչներին անհապաղ հանել ուղևորների ձեռնաշղթաները։ Այս մասին տեղեկացրել է Բրազիլիայի արդարադատության նախարարությունը։
Արդարադատության նախարար Ռիկարդո Լևանդովսկին նախագահ Լուիս Ինասիո Լուլա դա Սիլվային ներկայացրել է իրավիճակը՝ այն անվանելով «Բրազիլիայի քաղաքացիների իրավունքների հանդեպ աղաղակող արհամարհանք»։
Ըստ կառավարության՝ ինքնաթիռում գտնվել է 88 բրազիլացի։
