ՀՀ աջակցությունը Լեռնային Ղարաբաղին ունի հումանիտար բնույթ. ՀՀ ԱԳՆ
Ադրբեջանական կողմի ներկայացրած թեզերը տարածաշրջանում նոր ռազմական
էսկալացիա ծավալելու դիվանագիտական նախապատրաստության են նման․
այս մասին նշված է ՀՀ ԱԳՆ տարածած հայտարարության մեջ:
«Ադրբեջանում հավատարմագրված օտարերկրյա դիվանագետների հետ հանդիպման
ժամանակ ադրբեջանցի պաշտոնյաների խոսույթը Լեռնային Ղարաբաղում էթնիկ զտումների և Հայաստանի
դեմ ագրեսիայի քաղաքականության իրականացման գործում միջազգային հանրությանը «համապատասխանատու»
կարգելու նպատակ ունի, ինչն անընդունելի է:
Հայաստան-Ադրբեջան պետական սահմանից զորքերի հայելային հետքաշման
առաջարկը շարունակում է մնալ ուժի մեջ և Հայաստանի Հանրապետությունը պատրաստ է օր առաջ
ներգրավվել դրա իրականացման շուրջ քննարկումներում:
ՀՀ աջակցությունը Լեռնային Ղարաբաղին ունի հումանիտար բնույթ, ինչի
անհրաժեշտությունը ավելի է ընդգծվում Լաչինի միջանցքի ապօրինի արգելափակման հետևանքով
ծավալվող հումանիտար ճգնաժամով: Հայաստանի Հանրապետությունը ողջունում է երկարատև դադարից
հետո հումանիտար առաջին բեռների մուտքը Լեռնային Ղարաբաղ և հույս ունի, որ այն շարունակական
ու կայուն բնույթ կկրի:
«Միևնույն ժամանակ հարկ ենք համարում ընդգծել, որ Լաչինի միջանցքի
9 ամիս շարունակվող արգելափակումը 2020թ․ նոյեմբերի 9-ի եռակողմ հայտարարության
և Արդարադատության միջազգային դատարանի փետրվարի 22-ի և հուլիսի 6-ի իրավաբանական պարտադիր
ուժ ունեցող որոշումների կոպտագույն խախտում է»,-ասված է հաղորդագրության մեջ:
ՀՀ ԱԳՆ-ն հիշեցրել է, որ Ադրբեջանն է իր ապօրինի գործողություններով
հումանիտար ճգնաժամ է ստեղծել Արցախում, խափանել գազի և էլեկտրականության մատակարարումները։
Արտաքին քաղաքական գերատեսչությունից նշել են, որ լարվածության
թուլացման միջոցը համարում են Բաքու-Ստեփանակերտ երկխոսությունը և հույս ունեն, որ
միջազգային գործընկերները հավելյալ միջոցներ կձեռնարկեն երկխոսության հուսալի մեխանիզմներ
ստեղծելու համար։
