Մակրոնի ու Մասկի հարաբերությունները «վերածվել են սերիալի». Politico

Ֆրանսիայի նախագահ Էմանուել Մակրոնի և ԱՄՆ Կառավարության արդյունավետության դեպարտամենտի (DOGE) տնօրեն Իլոն Մասկի հարաբերությունները վերջին շաբաթների ընթացքում վատթարացել են, հայտնում է Politico-ն՝ հղում անելով աղբյուրներին։

Հրատարակությունը խոսում է 2024 թվականի դեկտեմբերի սկզբին Փարիզի Աստվածամոր տաճարի բացման արարողության ժամանակ տեղի ունեցած միջադեպի մասին՝ հավելելով, որ դա կարող էր Մասկի համար «վատ նստվածք» թողնել ուղևորությունից։ Ըստ Politico-ի՝ արարողության տեղերը հյուրերին հատկացնելուց հետո Մասկն անսպասելիորեն շարժվել է աթոռների առաջին շարքեր՝ ավելի մոտ նստելու ԱՄՆ ներկայիս նախագահ Դոնալդ Թրամփին, սակայն ձեռնարկատիրոջը խնդրել են տեղափոխվել իններորդ շարք, իսկ Թրամփը նստած էր Մակրոնի և Ֆրանսիայի առաջին տիկին Բրիջիթ Մակրոնի միջև:

Հոդվածում նշվել է նաև, որ ձեռնարկատերը չի մասնակցում Փարիզում ընթացող արհեստական ինտելեկտի գագաթնաժողովին։ Պարբերականը դա համարում է «հարված նախագահին», քանի որ Մակրոնը տարիներ շարունակ փորձել է Մասկին համոզել ներդրումներ կատարել Ֆրանսիայում։ Սակայն, ինչպես ընդգծել է հրատարակությունը, մյուս կողմից, դա հնարավորություն է տվել խուսափել Մակրոնին գագաթնաժողովում հնարավոր «երկրորդական իրադարձությունից»։

Այնուամենայնիվ, մինչև վերջին պահը ֆրանսիական իշխանությունները կարծում էին, որ Մասկի հայտնվելը AI-ի գագաթնաժողովին դեռ հնարավոր է, գրել է Politico-ն։ Մակրոնը հունվարի կեսերին քննարկել է միջոցառմանը ամերիկացի գործարարի մասնակցության հնարավորությունը ֆրանսիացի միլիարդատեր Քսավյե Նիլի և գիտնական Արթուր Մենշի հետ։

«Հարցն այն էր, թե պայքարե՞լ նրա համար (արհեստական ինտելեկտի գագաթնաժողովին Մասկի ժամանման), թե՞ ոչ: Մենք կարող էինք նրան ընդունել, բայց նա չպետք է ամբողջ ուշադրությունը գրավեր իր վրա», – հրատարակությանը հայտնել է Մակրոնի հետ հանդիպման անանուն մասնակիցներից մեկը:

Politico-ն, վկայակոչելով մի քանի աղբյուրների, ավելացրել է, որ Մակրոնն ու Մասկը անմիջական կապի մեջ են միմյանց հետ, և նրանց հարաբերությունները «վերածվել են սերիալի»։ Հրատարակությունը հիշեցրել է, որ Մասկի Tesla ընկերությունը որոշել է հանրապետությունում ներդրումներ անելու փոխարեն ընդլայնել իր գործարանը Գերմանիայում: Միաժամանակ հոդվածում նշվել է, որ Մակրոնը դեռ չի հրաժարվել երկրի համար «Մասկի միլիոնները ներգրավելու» փորձերից։

Փետրվարի 10-11-ը Փարիզում տեղի է ունենում արհեստական ինտելեկտի (AI) կոնֆերանսը։ Համաժողովին մասնակցում են ավելի քան 80 երկրների ներկայացուցիչներ, այդ թվում՝ պետությունների ղեկավարներ, գործարարներ, գիտնականներ և քաղաքացիական հասարակության անդամներ։