ԱՄՆ Սենատի արտաքին
հարաբերությունների հանձնաժողովի նախագահ Ռոբերտ Մենենդեսը Արցախում էթնիկ զտումների
քաղաքականության համար Ադրբեջանի նկատմամբ պատժամիջոցների հարցը քննարկելու անհրաժեշտություն
է տեսնում: Իր դիրքորոումը սենատորը հայտնել է Արտաքին հարաբերությունների հանձնաժողովում
«Լեռնային Ղարաբաղում ճգնաժամի գնահատում» խորագրով լսումներին:
Սենատորը նշել է՝ հաշվի առնելով, որ Ադրբեջանը սահմանի երկայնքով զորքեր է կուտակում,
պետք է պատրաստ լինել ռազմական գործողությունների: Մենենդեսն ընդգծել է՝ ժամանակն էական է: Նա մեջբերել է Միջազգային
քրեական դատարանի նախկին դատախազ Լուիս Մորենո Օկամպոյի զեկույցից մի հատված՝ սովը
ցեղասպանության անտեսանելի զենքն է, առանց անմիջական կտրուկ փոփոխությունների՝ հայերի
այս խումբը մի քանի շաբաթից կկործանվի:
«Մի քանի շաբաթ, այսքան ժամանակ մենք ունենք»,-շեշտել է Մենենդեսը:
Խոսելով ադրբեջանական վայրագությունը կանխելու համար Բայդենի վարչակազմից և միջազգային
հանրությունից ակնկալվող գործողություններից՝ նա նշել է. «Մեր ուղերձը ամենաբարձր մակարդակներից
պետք է լինի միանշանակ՝ դադարեցրեք շրջափակումը, դադարեցրեք սպառնալիքները Լեռնային
Ղարաբաղի ժողովրդի հասցեին, դադարեցրեք սպառնալիքները հայերի հասցեին, բացեք Լաչինի
միջանցքն անմիջապես»:
Սենատորն ընդգծել է՝ սրանք այն պարտավորություններն են, որոնք Ադրբեջանը ինքն է ստանձնել
2020 թվականի նոյեմբերի 9-ին հրադադարի պայմանավորվածությամբ:
Նա հույս է հայտնել, որ կգտնեն, թե ինչ տարբերակով կարող են մեղմել հումանիտար ճգնաժամը
Արցախի հայերի համար, ինչ միջոցներ պետք է ձեռնարկել՝ ստիպելու համար Բաքվի իշխանություններին
բացել Լաչինի միջանցքը:
«Եվ ինչո՞ւ մենք ավելի հրապարակայնորեն չենք քննարկում պատժամիջոցները այն գործունեության
համար, որը, կարծում եմ, բոլորս կարող ենք համաձայնել, ակնհայտորեն պատժելի է»,-եզրափակել
է իր խոսքը Մենենդեսը:
