Ազգերի լիգա․ Հայաստանի ազգային հավաքականը սեփական հարկի տակ խոշոր հաշվով պարտություն կրեց Վրաստանից

Ֆուտբոլի Հայաստանի ազգային հավաքականն ՈւԵՖԱ-ի Ազգերի լիգայի խաղարկության անցումային փլեյ-օֆֆի դիմակայության առաջին խաղում Երևանի Վազգեն Սարգսյանի անվան «Հանրապետական» ստադիոնում 0-3 հաշվով պարտվեց Վրաստանի թիմին:

32-րդ րոպեին «Նոայի» կիսապաշտպան Արտակ Դաշյանի սխալից հետո վրացիները հակագրոհ կազմակերպեցին, հաշիվը բացեց իսպանական «Լևանտեի» կիսապաշտպան Գեորգի Կոչորաշվիլին:  5 րոպե անց ֆրանսիական «Լիոնի» հարձակվող Ժորժ Միկաուտաձեն փոխանցում ստացավ դարպասապահ Գիորգի Մամարդաշվիլիից և գրավեց Օգնյեն Չանչարևիչի դարպասի մոտակա անկյունը: Սա Մամարդաշվիլիի կարիերայում առաջին գոլային փոխանցումն էր:

Երկրորդ խաղակեսի մեկնարկից 13 րոպե անց վրացիները Հարոյանի և Սևիկյանի սխալներից հետո սեփական տուգանային հրապարակի մատույցներից հակագրոհ սկսեցին, Գեորգի Չակվետաձեի առաջխաղացումից և փոխանցումից հետո դուբլ գրանցեց Ժորժ Միկաուտաձեն:

Հայաստանի ազգային հավաքականը նիդերլանդցի մասնագետ Ջոն վան’տ Սխիպի գլխավորությամբ առաջին խաղում պարտվեց 0-3 հաշվով:

Դիմակայության պատասխան խաղը տեղի կունենա մարտի 23-ին Թբիլիսիում և կմեկնարկի Երևանի ժամանակով 18:00-ին: