ԱՄՆ-ը Սիրիային է փոխանցել պայմանների ցանկը, որոնք պետք է կատարվեն պատժամիջոցների մասնակի թուլացման դիմաց. Reuters

ԱՄՆ-ը Սիրիային է փոխանցել պայմանների ցանկը, որոնք Դամասկոսը պետք է կատարի պատժամիջոցների մասնակի չեղարկման դիմաց․ հայտնում է Reuters-ը՝ վկայակոչելով աղբյուրներին։

Գործակալության տվյալներով՝ ցանկում ներառված է նաև դրույթ օտարերկրացիների բարձր մակարդակի ղեկավար պաշտոններ չզբաղեցնելու մասին։

ԱՄՆ-ի և Սիրիայի հարցերով փոխպետքարտուղարի օգնական Նատաշա Ֆրանչեսկին մարտի 18-ին Բրյուսելում Սիրիայի հարցով դոնորների համաժողովի շրջանակում մասնավոր հանդիպման ժամանակ պահանջների ցուցակ է փոխանցել Սիրիայի արտգործնախարար Ասադ աշ-Շիբանիին:

ԱՄՆ-ի կողմից առաջադրված պայմաններից մեկն էլ այն է, որ Սիրիան ոչնչացնի քիմիական զենքի մնացած բոլոր պաշարները և համագործակցի ահաբեկչության դեմ պայքարում, հայտնել են աղբյուրները։

Մեկ այլ պահանջ, ըստ աղբյուրների, այն է, որ օտարերկրյա զինյալները չզբաղեցնեն բարձր պաշտոններ Սիրիայի կառավարման կառույցում:

Սիրիան արդեն նշանակել է մի քանի օտարերկրյա նախկին ապստամբների, դրանց թվում՝ ույղուրի, հորդանանցու և թուրքի, իր պաշտպանության նախարարությունում, ինչն անհանգստացրել է օտարերկրյա կառավարություններին:

Վաշինգտոնը նաև խնդրեց Սիրիային նշանակել ներկայացուցիչ, որը կաջակցի ԱՄՆ ջանքերին՝ գտնելու ամերիկացի լրագրող Օսթին Թայսին, ով անհետացել էր Սիրիայում ավելի քան մեկ տասնամյակ առաջ:

Բոլոր պահանջները բավարարելու դիմաց Վաշինգտոնը որոշակի թեթևացում կտրամադրի պատժամիջոցների հարցում, ասել են աղբյուրները։ Կոնկրետ գործողություններից մեկը կարող է լինել երկու տարով երկարաձգել սիրիական կառավարական կառույցների հետ գործարքների համար գործող բացառումը և, հնարավոր է, մեկ այլ բացառում մտցնել:

ԱՄՆ-ը նաև հայտարարություն է տարածելու՝ ի պաշտպանություն Սիրիայի տարածքային ամբողջականության, նշել է աղբյուրը։ Վաշինգտոնը պայմանների կատարման կոնկրետ ժամկետներ չի ներկայացրել։ Պետքարտուղարության ներկայացուցիչը հայտարարել է, որ գործակալությունը «մեր մասնավոր դիվանագիտական ​​զրույցները հրապարակայնորեն չի քննարկում»:

Պետքարտուղարության խոսնակ Թեմմի Բրյուսն անցյալ շաբաթ հայտարարել էր, որ Վաշինգտոնը վերահսկում է երկրի ժամանակավոր ղեկավարների գործողությունները։

Հունվարին ԱՄՆ-ը տրամադրեց վեցամսյա ընդհանուր արտոնագիր՝ հեշտացնելու հումանիտար օգնության առաքումը, սակայն դա անբավարար համարվեց՝ թույլ տալու համար Կատարին պետական ​​հատվածի աշխատավարձերը վճարել Սիրիայի կենտրոնական բանկի միջոցով: Սիրիացի պաշտոնյաները, նրանց թվում՝ Շիբանին և ժամանակավոր նախագահ Ահմեդ աշ-Շարաան, կոչ են արել ամբողջությամբ չեղարկել պատժամիջոցները՝ հայտարարելով, որ անարդարացի է դրանք պահպանել, երբ Ասադը տապալվեց դեկտեմբերին կայծակնային ապստամբների հարձակման արդյունքում: