ՌԴ-ում միգրանտների երեխաները դպրոցում սովորելու համար ռուսերենի քննություն կհանձնեն

Ապրիլի 1-ից Ռուսաստանի Դաշնությունում կստուգվի երեխայի ծնողների և երեխայի Ռուսաստանի Դաշնությունում գտնվելու օրինականությունը։ ՌԴ-ի դպրոցներում սովորելու համար  այլևս անհրաժեշտ է ռուսերենից անպայման քննություն հանձնել և անցողիկ շեմը հաղթահարել, հակառակ դեպքում  երեխան ուղղակի չի կարող սովորել դպրոցում․ հայտնել է «Հայկական Կրիտաս» կազմակերպության միգրացիոն ծրագրի փորձագետ Տաթևիկ Բեժանյանը։

«Փետրվարի 5-ից ստուգումներ էին իրականացվում երեխաների՝ Ռուսաստանի Դաշնությունում օրինական գտնվելու վերաբերյալ, բայց պետք է հաշվի առնել, որ սկսած ապրիլի 1-ից՝ խիստ ստուգումներ են լինելու ՌԴ բոլոր դպրոցներում։ Եթե երեխաների  գրանցումը կեղծ է կամ գրանցման ժամկետը լրացել է, ապա պատիժ սպառնում է նաև ծնողներին։ Անգամ  եթե ծնողը օրինական է գտնվում երկրում, ապա հնարավոր է փաստաթղթերի  չեղարկում և արտաքսում»-նշել է Բեժանյանը։

Ի՞նչ անել այս դեպքում և ի՞նչ ընթացակարգ է սպասվում։

«Ոչ մի պարագայում կեղծ ռեգիստրացիա չգնել։ Կեղծ ռեգիստրացիան կտանի դեպի քրեական դաշտ, եթե չդատեն, կարտաքսեն: Խուսափել կեղծ ռեգիստրացիաներ  գնելուց։ Մինչև Ռուսաստանի Դաշնություն մեկնելը, երեխաների հետ պարապել ռուսաց լեզու, եթե երեխան պետք է դպրոցում սովորի, որովհետև հարցերի 90%-ին պետք է երեխաները ճիշտ պատասխանեն։ Այլապես չեն կարող հաղթահարել անցողիկ շեմը, անցողիկ շեմը հենց 90%-ն է»- բացատրել է մասնագետը:

Եթե ընտանիքի մի անդամն է միայն աշխատանքային միգրանտ, ապա երբ նա կնքում է աշխատանքային պայմանագիր և իր պայմանագրի ժամկետով կարողանում է երկարացնել իր ռեգիստրացիան Ռուսաստանի դաշնությունում, այդ նույն պայմանագրի ժամկետով կարող է երկարացնել իր կնոջ/ամուսնու, երեխաների ռեգիստրացիան։