Ամենախոշոր զբոսանավերից մեկի ավելի քան 200 ուղևոր վարակվել է նորովիրուսային վարակով

Queen Mary 2-ը՝ աշխարհի ամենաշքեղ զբոսանավերից մեկում նորովիրուսային վարակի բռնկում է տեղի ունեցել. 224 մարդ վարակվել է վիրուսով, որն ախտահարում է ստամոքսը։ Նշենք, որ զբոսանավում 2538 ուղևոր կա։

Նորովիրուսը փոխանցվում է աղտոտված մակերեսների, սննդի և ջրի միջոցով, փոխանցվում նաև մարդուց մարդ: Հիվանդները երկար ժամանակ կորցնում են մեծ քանակությամբ հեղուկ, ինչը հատկապես վտանգավոր է տարեց մարդկանց համար․ գրում է Bild-ը։

Համաճարակի բռնկումը տեղի է ունեցել մարտի կեսերին՝ անգլիական Սաութհեմփթոնից Նյու Յորքով Կարիբյան կղզիներ ճանապարհորդելու ընթացքում:

«Մեր թիմի արագ արձագանքման և ձեռնարկված լրացուցիչ միջոցների շնորհիվ մենք արդեն նկատում ենք գրանցված դեպքերի թվի նվազում», – ասել է զբոսանավի սեփականատեր Cunard Line-ի տարածած հաղորդագրության մեջ։