Գազայում 1400 պաղեստինցի է սպանվել մեկ ամսից էլ քիչ ժամկետում

Ավելի քան 1400 պաղեստինցի է սպանվել, ավելի քան 3600-ը՝ վիրավորվել Գազայի հատվածում մարտի 18-ին վերսկսված մարտերի պատճառով. հայտնել է անկլավի Առողջապահության նախարարությունը:

«Մարտի 18-ից ի վեր Գազայում զոհերի թիվը հասել է 1449-ի, ևս 3647-ը վիրավորվել է»,- նշվել է հաղորդագրության մեջ։

Գերատեսչությունը հավելել է, որ 2023 թվականի հոկտեմբերից Գազայում սպանված պաղեստինցիների թիվը հասել է 50,810-ի, վիրավորվել է 115,688 մարդ։

Մարտի 18-ին իսրայելական բանակը վերսկսել է ռազմական գործողությունները Գազայի հատվածում՝ լայնածավալ հարվածներ հասցնելով անկլավին և դրանով իսկ ընդհատելով այս տարվա հունվարին հաստատված հրադադարը։ Իսրայելի վարչապետ Բենիամին Նեթանյահուի գրասենյակը դա բացատրել է պաղեստինյան արմատական ՀԱՄԱՍ շարժման կողմից միջնորդների և ԱՄՆ նախագահի հատուկ բանագնաց Սթիվեն Վիտկովի կողմից բանակցությունների ընթացքում արված առաջարկներից հրաժարվելով՝ նշելով, որ այդ հատվածում գործողության նպատակը բոլոր պատանդներին ազատելն է։