Դեռևս հնարավոր չէ կանխատեսել Թրամփի քաղաքականության ազդեցությունը Եվրասիական մայրցամաքի վրա. ԱՊՀ գլխավոր քարտուղար
ԱՄՆ նախագահ Դոնալդ Թրամփի՝ Ռուսաստանի հետ անվտանգության երկխոսությունը և շփումները վերականգնելու մտադրությունը զգուշավոր լավատեսություն է ներշնչում. «Союзники. ОДКБ» հրապարակմանը հայտարարել է ԱՊՀ գլխավոր քարտուղար Սերգեյ Լեբեդևը։
«Մի կողմից, ինչպես նշել են ԱՊՀ մի շարք ղեկավարներ վերջին հայտարարություններում, Դոնալդ Թրամփի վճռականությունը՝ վերականգնելու երկխոսությունը տարածաշրջանում անվտանգության հարցերի շուրջ, ինչը հաստատվել է Ռուսաստանի և Չինաստանի բարձրագույն ղեկավարության հետ անմիջական շփումներով, չափավոր լավատեսություն է ներշնչում: Համոզված եմ, որ նման քայլեր ձեռնարկելու պատրաստակամությունը փոխզիջումային լուծումներ գտնելու և փոխադարձ վստահությունը վերականգնելու առաջնային պայմանն է», – նշել է ԱՊՀ գլխավոր քարտուղարը։
Մեկնաբանելով Միացյալ Նահանգների ներկայիս իրավիճակի ազդեցությունը եվրասիական տարածաշրջանում իրավիճակի վրա՝ Լեբեդևը հիշեցրել է, որ Թրամփը իշխանության է եկել «ներքաղաքական թեժ պայքարի, սոցիալական բևեռացման, բազմաթիվ բռնությունների ֆոնին, որոնք ցույց են տվել հանրապետական և դեմոկրատ թեկնածուների կողմից առաջ քաշված օրակարգերի աննախադեպ անհամատեղելիությունը»։
«Իրականում Միացյալ Նահանգների քաղաքացիները կանգնած էին հետևյալ այլընտրանքների առաջ՝ կա՛մ շարունակել այն ճանապարհը, որը նախանշել էր այն ժամանակվա վարչակազմը, կա՛մ գործի դնել նորը երկրի ժամանակակից պատմության մեջ»,- նշել է նա։
ԱՊՀ գլխավոր քարտուղարի խոսքով՝ «զարմանալի չէ, որ պարոն Թրամփը, ստանալով ընտրողների մեծամասնության կողմից քաղաքական կուրսը թարմացնելու մանդատ, սկսել է վերանայել իր նախորդների քաղաքականությունը»։
Լեբեդևն ընդգծել է, որ մինչ օրս Թրամփի արտաքին քաղաքականության ռազմավարության ուրվագծերը «դեռ ժամանակ չեն ունեցել դրսևորվելու այնքանով, որքանով անհրաժեշտ է՝ կանխատեսումներ անելու Եվրասիական մայրցամաքում իրերի վիճակի հնարավոր փոփոխության վերաբերյալ»:
