Ադրբեջանցի զինվորները կմասնակցեն Մոսկվայում Հաղթանակի շքերթին, իսկ հայե՞րը
ՌԴ ԱԳՆ ներկայացուցիչ Մարիա Զախարովան ճեպազրույցի ժամանակ նշել է, որ ՀՀ վարչապետ Նիկոլ Փաշինյանն ԱՊՀ երկրների մնացած առաջնորդների հետ հրավիրվել է Մոսկվա Հաղթանակի օրվա միջոցառումներին մասնակցելու։ Զախարովան կոնկրետ պատասխան չի տվել, թե արդյո՞ք ՀՀ զինվորականները մասնակցելու են շքերթին, թե՞՝ ո՛չ։ Նա խորհուրդ է տվել այդ հարցով դիմել ՌԴ Պաշտպանության նախարարություն։
Հիշեցնենք, որ Ռուսաստանում Ադրբեջանի արտակարգ և լիազոր դեսպան Ռահման Մուստաֆաևը հանդիպել է Ադրբեջանի Հանրապետության զինված ուժերի զինծառայողների հետ, որոնք ժամանել են Մոսկվա՝ մայիսի 9-ին Հաղթանակի շքերթին մասնակցելու համար: Դիվանագիտական առաքելության ղեկավարը շքերթին ադրբեջանցի զինծառայողների մասնակցությունը գնահատել է որպես Հայրենական մեծ պատերազմում զոհված ադրբեջանցի զինվորների հիշատակին հարգանքի տուրք:
Նա ընդգծել է, որ 2020 թվականի 44-օրյա Հայրենական պատերազմում Ադրբեջանի հաղթանակից ի վեր առաջին անգամ Ադրբեջանի զինծառայողները շքերթով կանցնեն Կարմիր հրապարակում։
Դիվանագետը հավելել է, որ «Ադրբեջանն, իր հավասարակշռված արտաքին քաղաքականության շնորհիվ, կարևոր ներդրում է ունենում տարածաշրջանի կայունության գործում»։
«Ռուսաստանն Ադրբեջանի դաշնակից պետություն է, և այսօր՝ աշխարհում փոփոխությունների դարաշրջանում, նման կապերի կարևորությունն ավելի է մեծանում»,- նշել է նա։
