Հռոմի պապ Լևոն XIV-ը ցանկանում է կանխել արհեստական բանականության «վերածումն Աստծո»

 Հռոմի պապ Լևոն XIV-ն իր պապականության որոշիչ առաքելությունը դարձրել է արհեստական ինտելեկտի ռիսկերի նվազեցումը. գրել է Politico-ն։

Կարդինալներին ուղղված իր առաջին պաշտոնական ուղերձում նա զգուշացրել է «մարդկային արժանապատվության, արդարադատության և աշխատանքի համար» արհեստական բանականության վտանգների մասին: Երկու օր անց, լրագրողների հետ խոսելով, նա գովաբանել է տեխնոլոգիայի «հսկայական ներուժը»՝ միաժամանակ զգուշացնելով, որ այն պահանջում է պատասխանատվություն՝ «ապահովելու, որ այն կարող է օգտագործվել բոլորի բարօրության համար»: Ինչպես իր անվանակիցը՝ 19-րդ դարի Հռոմի պապ Լևոն XIII-ը, ով արդյունաբերական հեղափոխության ժամանակ պաշտպանում էր աշխատավորների իրավունքները, Լևոն XIV-ն իրեն դիրքավորում է որպես սոցիալական կառուցվածքի պահապան՝ անվերահսկելի ժամանակակից տեխնոլոգիաների պայմաններում:

«Եկեղեցին մեզանից խնդրում է նայել դեպի երկինք, բայց նաև քայլել երկրի վրա՝ համաձայն ժամանակների», – Politico -ի հետ զրույցում նշել է ֆրանցիսկյան միաբան և Վատիկանի արհեստական ինտելեկտի էթիկայի հարցերով խորհրդական Պաոլո Բենանտին՝ հավելելով, որ եկեղեցու կողմից նման ֆուտուրիստական ոլորտում փորձագիտություն առաջարկելու մեջ ոչ մի անսովոր բան չկա։

«Վատիկանը ցանկանում է խուսափել արհեստական բանականության ոլորտում որոշ զարգացումներից, որոնք կարող են վնասել մարդու իրավունքներին և մարդկային արժանապատվությանը, ինչը, հավանաբար, անհամաչափորեն կազդի ցածր որակավորում ունեցող աշխատողների վրա», – նշել է Հռոմի Լուիս համալսարանի և Սասեքսի համալսարանի նորարարության տնտեսագիտության պրոֆեսոր և արհեստական բանականության փորձագետ Մարիա Սավոնան։

Էթիկայի մասնագետները, փիլիսոփաները և տեխնոլոգիական մագնատները իրենք են զգուշացրել ընկերությունների կողմից ինտելեկտուալ կյանքի ձևեր ստեղծելու ռիսկերի մասին: Միլիարդատեր, X-ի սեփականատերը և արհեստական բանականության բոտ Grok-ի մշակող Իլոն Մասկը արհեստական բանականությունը համեմատել է «թվային Աստծո» ստեղծման հետ:

Հունվարին Վատիկանը հրապարակել է պաշտոնական հայտարարություն՝ զգուշացնելով, որ արհեստական ինտելեկտը կարող է հանգեցնել մարդկության «սեփական աշխատանքի ստրկացմանը»։
Իտալիայի վարչապետ Ջորջիա Մելոնիի հետ Լեոյի առաջին հեռախոսազրույցի ժամանակ կողմերը խոստացել են շարունակել աշխատել «արհեստական բանականության էթիկական և մարդակենտրոն զարգացման» ուղղությամբ։