Ուղղափառ հրեաները փորձել են ներխուժել Երուսաղեմի գլխավոր հայկական եկեղեցի

Մի խումբ ուղղափառ հրեաներ փորձել են առանց թույլտվության մուտք գործել Երուսաղեմի հայկական վանքի տարածք․ X-ի իր միկրոբլոգում հայտնել է տեղի հայկական թաղամասի փրկության շարժման ներկայացուցիչ Գեղամ Բալյանը։

Միջադեպը տեղի է ունեցել հունիսի 8-ի առավոտյան՝ Սուրբ Հակոբ տաճարի մուտքի մոտ՝ հայկական թաղամասի փակ և պահպանվող տարածքում: Իրավիճակին միջամտած հայ համայնքի անդամներից մեկի խոսքով՝ երբ նրանց բացատրել են, որ այն մասնավոր եկեղեցական սեփականություն է և մուտքը խստիվ արգելված է, փորձել են կոնֆլիկտ հրահրել։

«Սա մեր երկիրն է, մենք կարող ենք գնալ ուր ուզենք»,- հայտարարել է նրանցից մեկը:

Ռեպլիկներից հետո խումբն, ի վերջո, լքել է տարածքը, հավելել է Բալյանը։

Սուրբ Հակոբի վանքը ծառայում է որպես Երուսաղեմի գլխավոր հայկական եկեղեցի: Վանքի կապը հայերի հետ փաստագրված է 12-րդ դարից։ Եկեղեցու ամենավաղ հայերեն արձանագրությունները թվագրվում են 1151-1153 թվականներով։ Երկուսն էլ փորագրված են 1835 թվականի վերականգնման ժամանակ հայտնաբերված հուշակոթողների վրա։ Ժամերգություններից բացի, եկեղեցին երբեմն օգտագործվել է որպես ապաստան տեղի հայ համայնքի համար։