Թրամփը հայտարարել է, որ կքննարկի Մասկի արտաքսման հարցը նրանց միջև թշնամության վերսկսման ֆոնին

ԱՄՆ նախագահ Դոնալդ Թրամփը հայտարարել է, որ իր վարչակազմը «պետք է քննարկի» Իլոն Մասկի արտաքսման հարցը, այն բանից հետո, երբ միլիարդատերը վերսկսեց վեճը նախագահի հետ՝ կապված ծախսերի մասին օրինագծի հետ․ գրում է ABC News-ը։

Նշվում է, որ Մասկը շաբաթվա վերջին X սոցիալական ցանցում մի քանի գրառում է կատարել՝ քննադատելով հանրապետականներին «Մեծ, գեղեցիկ օրինագծի» համար՝ պնդելով, որ այն ավելացնում է երկրի դաշնային պարտքը։

«Այս օրինագծի խելահեղ ծախսերի պայմաններում, որը պարտքի շեմը բարձրացնում է ռեկորդային հինգ տրիլիոն դոլարով, ակնհայտ է դառնում, որ մենք ապրում ենք միակուսակցական երկրում», – գրել է Մասկը։

Երեքշաբթի վաղ առավոտյան Թրամփը հակադարձեց Truth Social-ում հրապարակված գրառմամբ, որում պնդում էր, որ Մասկը վրդովված է էլեկտրական մեքենաների մանդատի վերացման մասին օրինագծով, և որ «Իլոնը ստիպված կլինի փակել իր խանութը և վերադառնալ տուն՝ Հարավային Աֆրիկա»։ Հիշեցնենք, որ Մասկը ծնվել է Հարավային Աֆրիկայում, սակայն հետագայում ստացել է  ԱՄՆ քաղաքացիություն։

Լրագրողների հարցին, թե արդյոք նա կարտաքսի Մասկին, Թրամփը պատասխանեց. «Մենք պետք է քննարկենք այդ հարցը»։