ՄԱԿ-ի ԱԽ-ում Արցախի հարցով նիստը ոչինչ չտվեց, բանաձև է պետք․ Ադամ Շիֆ
ԱՄՆ նախագահ Ջո Բայդենը և ԱՄՆ վարչակազմը Արցախի հարցով պետք է
շատ ավելին անեն, քան հիմա․ այս մասին X-ի իր էջում հրապարակած
տեսաուղերձում ասել է կոնգրեսական Ադամ Շիֆը։
Նա նշել է, որ ՄԱԿ-ի Անվտանգության խորհրդում Արցախի շրջափակման
վերաբերյալ քննարկումը ոչինչ չի տվել, իսկ ճգնաժամը սուր է։
«Արցախի 120 հազար բնակիչ զրկված են սննդամթերքի, դեղորայքի և այլ
հնարավորություններից։ Արդյունքում մարդիկ մահանում են»,– ասել է կոնգրեսականը։
Շիֆը տեղեկացրել է, որ հեռախոսազրույց է ունեցել ՄԱԿ-ում ԱՄՆ ներկայացուցչի
հետ ու խոսել Անվտանգության խորհրդի նիստի մասին։
«Ցավոք, ոչինչ չստացվեց։ Անհրաժեշտ է բանաձև, որը կպահանջի դադարեցնել
միջազգային իրավունքի այս խախտումը, անհրաժեշտ է ապահովել պարենի և դեղորայքի ազատ
հասանելիությունը, ինչպես նաև մարդկանց ազատ տեղաշարժը», – հայտարարել է նա։
Կոնգրեսականը նշել է՝ հատկապես այժմ Ադրբեջանին ոչ մի կոպեկ չպետք
է տրամադրել։
«Ես խորապես մտահոգված եմ նոր ցեղասպանության վտանգով»,- հայտարարել
է կոնգրեսականը։
