Իշխանափոխության պահանջից մինչև աշխատավարձի ու կենսաթոշակի ավելացման խոստում. «Մայր Հայաստանի» նախընտրական ծրագիրը

Երևանի ավագանու ընտրություններին մասնակցող «Մայր Հայաստան» դաշինքը
հրապարակել է նախընտրական ծրագիրը:

Դաշինքն ընդգծել է ամբողջական իշխանափոխության
հրամայականը՝ նշելով, որ գործող կառավարությունը կորցրել է իր իրավաքաղաքական լեգիտիմությունը,
Արցախն Ադրբեջանի մաս ճանաչելու՝ օրվա իշխանությունների ոչ լեգիտիմ քաղաքականությունը
նրանց դրել է օրենքից դուրս կարգավիճակում: Համապետական մասշտաբով իշխանափոխության
գործընթացը պետք է մեկնարկի Երևան քաղաքի ավագանու ընտրություններով:

Դաշինքի անդամները կարևորում են նաև Հայաստանի և Արցախի անվտանգային
միջավայրի վերականգնումը, բանակի հզորացումը:

«Արցախի պաշարումը վերացնելու առաջնային քայլ պետք է դիտվի
2020 թ. նոյեմբերի 9-ի եռակողմ հայտարարության դրույթների իրականացումը, որոնք ամբողջովին
խախտվել են Ադրբեջանի կողմից՝ ՀՀ իշխանությունների գործուն մասնակցությամբ: Հայաստանն
Արցախին կապող միջանցքի չբացվելու պարագայում, կկորցնենք Արցախը, և Ադրբեջանը հնարավորություն
կստանա սպառնալ Հայաստանի ինքնիշխանությանը, տարածքային ամբողջականությանը»,-ասված
է նախընտրական ծրագրում:

Կարևորվում է հանրային մթնոլորտի առողջացումը, պառակտմանը վերջ
դնելը:

Դաշինքը տնտեսական զարգացման ծրագիր է ներկայացրել, նշել բիզնես-դաշտի
և տեղական ինքնակառավարման մարմինների համար հարկային աջակցության, փոքր բիզնեսին արտոնյալ
կարգավիճակ տալու անհրաժեշտությունը:

Խոսելով սոցիալական քաղաքականության ծրագրերի մասին՝ Դաշինքը խոստացել
է նվազագույն աշխատավարձը հասցնել 120 000 դրամի, կենսաթոշակը՝ 80 000 դրամի:

Երևանի համար «Մայր Հայաստան» դաշինքն առաջարկում է փոխել մայրաքաղաքի
կառավարման որակը՝ ներդնելով «խելացի քաղաքի» մոդելը: