Մեծ Բրիտանիայում երեք մարդու ԴՆԹ-ից ութ առողջ երեխա է ծնվել
Մեծ Բրիտանիայում երեք մարդու ԴՆԹ-ից արտամարմնային բեղմնավորման միջոցով ութ առողջ երեխա է ծնվել։ Հետազոտության նպատակն է կանխել ծնողից երեխային անբուժելի գենետիկական խանգարումների ժառանգումը․ գրել է BBC-ն։
Մեծ Բրիտանիայի գիտնականների կողմից մշակված մեթոդի կիրառմամբ օգտագործվել է երեք մարդու գենետիկական նյութ․ վերցվել է մոր ձվաբջիջը, հոր սերմնահեղուկը և երկրորդ ձվաբջիջը դոնոր կնոջից։
Գիտնականները նշում են, որ տեխնիկան Մեծ Բրիտանիայում օրինական է եղել տասնամյակ շարունակ, սակայն այս վերջին հետազտությամբ իրենք ստացել են առաջին ապացույցը, որ այն կանխում է անբուժելի միտոքոնդրիալ հիվանդությունների՝ մորից երեխային փոխանցումը։
The Guardian-ի հաղորդմամբ՝ հետազոտության բոլոր մասնակիցների դեպքում ռիսկը բարձր էր, որ երեխաները կժառանգեին կյանքին սպառնացող հիվանդություններ մայրերի մոտ միտոքոնդրիումներում առկա մուտացիաների պատճառով։ Միտոքոնդրիումները տեղակայված են բջիջների ներսում և ապահովում են նրանց գործելու համար անհրաժեշտ էներգիան։
Նշվում է, որ երեք անձի մեթոդով ծնված երեխաները իրենց ԴՆԹ-ի մեծ մասը ժառանգում են ծնողներից, բայց նաև մի փոքր մաս՝ մոտ 0.1%, ստանում են դոնոր կնոջից։
Հետազոտության արդյունքում չորս տղա և չորս աղջիկ, այդ թվում՝ միաբջիջ երկվորյակների մեկ զույգ ծնվել են յոթ կանանցից։ Մինչ այս պահը երեխաների մոտ չի հայտնաբերվել միտոքոնդրիալ հիվանդությունների որևէ նշան։ Եվս մեկ հղիություն ընթացքի մեջ է։
