Հյուսիսային Կորեան դադարեցնում է օտարերկրյա զբոսաշրջությունը ծովափնյա հանգստավայրում՝ այն բացելուց մի քանի շաբաթ անց

Հյուսիսային Կորեան կասեցրել է օտարերկրյա այցելուների մուտքը Վոնսան-Կալմայի նոր լողափնյա հանգստավայր՝ այն տեղացիների և ռուսների փոքր խմբի համար բացելուց ընդամենը մի քանի շաբաթ անց․ գրում է Euronews-ը՝ հղում անելով DPR Korea Tour պետական զբոսաշրջային կայքին։ 

Հայտարարության մեջ ասվում է, որ «ժամանակավորապես չեն ընդունում օտարերկրյա զբոսաշրջիկների», առանց պատճառաբանելու կամ նշելու, թե երբ կվերացվի արգելքը։ Հայտարարությունը հաջորդում է Ռուսաստանի արտաքին գործերի նախարար Սերգեյ Լավրովի վերջերս երկիր այցելությանը, որտեղ նա բանակցություններ էր վարել Կիմ Չեն Ընի և արտաքին գործերի նախարար Չո Սոն Հուիի հետ։

Լավրովը լավատեսություն էր հայտնել տարածաշրջան ռուսական զբոսաշրջության խթանման վերաբերյալ՝ ասելով. «Ես վստահ եմ, որ ռուս զբոսաշրջիկները ավելի ու ավելի շատ կցանկանան գալ այստեղ»։