Վերջին 2 տարում Հայաստանում «անցանկալի անձ» է համարվել
ավելի քան տասնյակ մարդ։ Նրանց մեծամասնությունը ՀՅԴ անդամներ են, որոնք էլ դատական
գործընթաց են սկսել՝ Հայաստան մուտքի արգելքը չեղարկելու պահանջով։ Այսօր այդ գործով
առաջին նիստն է։
ՀՅԴ Բյուրոյի անդամ Մուրադ Փափազյանը հայտարարություն է տարածել՝
նշելով, որ հուսով է դատարանը կպարտադրի իշխանություններին հիմնավորել իր՝ Հայաստան
մուտք գործելու արգելքը։
«Տարբեր պաշտոնական վարկածները մեկ տարուց ավելի հակասում են միմյանց։
Ի վերջո, պատճառաբանվեց «պետական գաղտնիքը»։ Այժմ ժամանակն է բացահայտելու իրական
դրդապատճառները, որոնք դրդել են վարչապետ Նիկոլ Փաշինյանին՝ գնալ այս քայլին։ Ես միակը
չեմ, քանի որ Հայաստան վերադառնալու իմ արգելքից մի քանի օր անց նույն ճակատագրին արժանացան
Սյունե և Մասիս Աբրահամյանները, մի քանի ամիս անց՝ Նժդեհ Գարակավորյանը, Ասլան Ասլանյանը
և Արենի Մարկոսյանը։ Բոլորն էլ Դաշնակցության անդամներ են։ Հասկանալի է՝ խախտվել են
իրավունքի և ժողովրդավարության հիմնարար սկզբունքները։ Ազատությունների և ժողովրդավարության
դրոշները ծածանելով իշխանության եկած Նիկոլ Փաշինյանը ամեն քայլափոխի ոտնահարում է
դրանք»,-ասել է Փափազյանը։
Նա նշել է, որ անկախ ամեն ինչից շարունակելու պայքարը Հայաստանի
և Արցախի համար՝ բոլոր հնարավոր հարթակներում։
«Մենք ակնկալում ենք, որ Հայաստանի արդարադատությունը կպարտադրի
իշխանություններին՝ հրապարակել իմ մուտքի արգելքի պատճառները։ Դատական նիստը, որը
տեղի կունենա երկուշաբթի՝ օգոստոսի 21-ին, ժամը 15:00-ին, էական նշանակություն կունենա
Հայաստանի ժողովրդավարական մակարդակը որոշելու համար։ Իմ վճռականությունն անսասան է։
Եթե Հայաստանի արդարադատությունը ցույց տա այս խնդիրը լուծելու իր անկարողությունը,
ես Հայաստանի կառավարության դեմ պատրաստվում եմ դատական հայց ներկայացնել Մարդու իրավունքների
եվրոպական դատարանում»։
