Մինչ Թուրքիան առաջ է մղում «Զանգեզուրի միջանցքի» գաղափարը, ՌԴ-ն կորցնում է անդրկովկասյան օրակարգի նկատմամբ վերահսկողությունը․ քաղաքագետ
Անդրկովկասյան օրակարգի նկատմամբ վերահսկողության բացակայությունը երկարաժամկետ հետևանքներ կունենա Ռուսաստանի համար։ Այս կարծիքը հայտնել է Царьград կայքի քաղաքական մեկնաբան Անդրեյ Պինչուկը։
Նա նշել է, որ Թուրքիան վաղուց է առաջ մղում «Զանգեզուրի միջանցքի» գաղափարը, որը պետք է Ադրբեջանի հիմնական տարածքը կապի Նախիջևանի և հետագայում՝ Թուրքիայի հետ։
Նրա խոսքով՝ Հայաստանը, որի տարածքով նրանք ցանկանում են համապատասխան միջանցք ստեղծել, այս իրավիճակում հայտնվել է առանց Ռուսաստանի Դաշնության աջակցության, որը, պաշտոնապես մնալով ՀԱՊԿ-ում դաշնակից, փաստացի դուրս է մնացել օրակարգից։
«Եթե Մոսկվան չվերականգնի անդրկովկասյան օրակարգի նկատմամբ վերահսկողությունը, հետևանքները երկարաժամկետ կլինեն։ Սա միայն Երևանի կամ Բաքվի վրա ազդեցության կորուստ չէ։ Սա թույլ է տալիս տարածաշրջան մտնել այնպիսի խաղացողների, ինչպիսիք են ԱՄՆ-ն, Մեծ Բրիտանիան և Թուրքիան, որոնք չեն թաքցնում իրենց հակառուսական կողմնորոշումը», – ընդգծել է Պինչուկը՝ հավելելով, որ իրականում խոսքը Ռուսաստանին Եվրասիական աշխարհաքաղաքականության հիմնական տարածաշրջաններից մեկից դուրս մղելու մասին է։
