Ալյասկայի հանդիպումից հետո Թրամփն ու թիմակիցները շատ ավելի խորը մոտեցում են ցուցաբերել ուկրաինական ճգնաժամի լուծմանը․ Լավրով
ԱՄՆ նախագահ Դոնալդ Թրամփը և նրա թիմը շատ ավելի խորը մոտեցում են ցուցաբերել ուկրաինական կարգավորմանն Ալյասկայում ռուս-ամերիկյան գագաթնաժողովից հետո։ Այս մասին հայտարարել է Ռուսաստանի Արտաքին գործերի նախարար Սերգեյ Լավրովը՝ Россия-24 հեռուստաալիքի հետ զրույցում։ «Նախագահ Թրամփը և նրա թիմը՝ հատկապես Ալյասկայում հանդիպումից հետո, շատ ավելի խորը մոտեցում են ցուցաբերել այս ճգնաժամի լուծմանը՝ գիտակցելով, որ անհրաժեշտ է վերացնել արմատական պատճառները, որոնց մասին մենք՝ նախագահ Պուտինը, անընդհատ խոսել ենք», – նշել է նա։
Նախարարի խոսքով՝ այդ արմատական պատճառներից մեկը հենց Ռուսաստանի անվտանգության խնդիրն է։
«Դա կապված է այն փաստի հետ, որ ՆԱՏՕ-ի Արևելքում ընդլայնումը կանխելու համար մեզ տրված պարտավորությունները տասնամյակներ շարունակ կոպտորեն խախտվել են։ Նախագահը մի քանի անգամ նշել է, որ այս խոստումներից հետո ՆԱՏՕ-ի ընդլայնման հինգ ալիք է եղել», – հավելել է նախարարը։
Լավրովը նաև հավելել է, որ Ալյասկայի գագաթնաժողովում լավ մթնոլորտ էր և դա արտացոլվում է նախագահներ Պուտինի և Թրամփի բանակցություններից հետո արված հայտարարություններում։ «Դա անկասկած օգտակար զրույց էր։ Ակնհայտ էր, որ Միացյալ Նահանգների ղեկավարը և նրա թիմն անկեղծորեն ցանկանում են հասնել այնպիսի արդյունքի, որը կլինի երկարաժամկետ, կայուն, հուսալի», – նշել է արտգործնախարարը։
Օգոստոսի 15-ին Ալյասկայի Էլմենդորֆ-Ռիչարդսոնի ռազմաօդային բազայում տեղի է ունեցել Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հանդիպումը։ Այն տևել է մոտ երեք ժամ։
