Վճարել, բայց տուգանվե՞լ. քաղաքապետարանը պարզաբանել է՝ ինչպես բողոքարկել
Տրանսպորտի ուղեվարձը չվճարելու դեպքում տուգանվելու որոշմանը քաղաքացիները քիչ թե շատ համակերպվել են, սակայն պարզվում է՝ քաղաքացին կարող է տուգանվել անգամ եթե վճարել է: Մի քանի օր է՝ քաղաքացիները բողոքում են անհիմն տուգանքներից. քարտը մոտեցնում են վալիդատորին, լսում հաստատման ազդանշանը, դա, սակայն, բավարար ապացույց չեն համարում քաղաքապետարանի՝ շրջայց իրականացնող աշխատակիցները:
«Նման դեպքերում տուգանված քաղաքացիները ներկայացրել են քաղվածք բանկից: Համոզվելով, որ կատարվածը տեխնիկական խնդիր է, տուգանքը չեղարկել ենք»,- ABC media-ի հետ զրույցում պարզաբանել է Երևանի քաղաքապետի մամուլի խոսնակ Հայկ Կոստանյանը:
Վերջինիս խոսքով՝ քաղաքացիների տուգանքները չեղարկվելու են նույն սկզբունքով՝ համապատասխան թղթերի առկայության և ներկայացման դեպքում:
Քաղաքապետարանի աշխատակիցները ներկայանում են պաշտոնական հագուստով, բայց առանց համապատասխան վկայականի: Նրանք քաղաքացիներին խնդրում են տրամադրել բանկային քարտը՝ նույնականացման նպատակով. սակայն հարց է առաջանում՝ քաղաքացին ինչպե՞ս կարող է համոզված լինել, որ իրեն մոտեցած անձը քաղաքապետարանի աշխատակից է:
«Շուտով ավտոբուսներում շրջայց իրականացնող աշխատակիցները կրելու են համազգեստ: Հաշվի առնելով այն հանգամանքը, որ համազգեստը կրկնօրինակելը հնարավոր է և որոշակի ժամանակահատված է պահանջվելու այս փուլին անցնելու համար, աշխատակիցները իրենց մոտ ունենալու են վկայական, այսպիսով հավաստելով իրենց՝ քաղաքապետարանի ներկայացուցիչ լինելը»,- պարզաբանում է Կոստանյանը:
Շատ քաղաքացիներ երթևկում են հատուկ կարգ ունեցող բարեկամի կամ ծանոթի վճարային քարտով՝ նախապես քարտի համար վճարած գումարը քամուն չտալու նպատակով, ինչը քաղաքապետարանի մշակած դրույթներով խստիվ արգելվում է և ենթակա է տուգանքի:
«Խնդրի վերաբերյալ առաջիկայում կքննարկվեն տարբերակներ՝ դրույթներում փոփոխությունների վերաբերյալ, իսկ այս պահին քաղաքացիներին մնում է միայն ենթարկվել օրենքին»,- նշում է քաղաքապետի մամուլի խոսնակը:
Հիշեցնենք, որ տրանսպորտային միջոցներից օգտվելիս չվճարելու դեպքում տուգանվելու վերաբերյալ օրենքը ուժի մեջ է մտել 2025 թ.-ի օգոստոսի 1-ից: Քաղաքապետարանի աշխատակիցները պարբերական շրջայց են իրականացնում ավտոբուսներում, վճարից խուսափած քաղաքացիներին տեղում նույնականացնում և տուգանում:
