Մերցը ենթադրում է, որ Պուտինի և Զելենսկիի հանդիպումը կարող է չկայանալ
Գերմանիայի կանցլեր Ֆրիդրիխ Մերցը ենթադրել է, որ Ռուսաստանի նախագահ Վլադիմիր Պուտինի և Ուկրաինայի նախագահ Վլադիմիր Զելենսկիի հանդիպումը կարող է ընդհանրապես չկայանալ. գրում է РИА Новости-ն:
«Մենք այսօր կրկին պետք է քննարկենք այս թեման այն համատեքստում, որ Զելենսկիի և Պուտինի հանդիպումը, թվում է, չի կայանալու՝ չնայած անցյալ շաբաթ այն համաձայնեցվել էր ԱՄՆ նախագահ Թրամփի և Պուտինի միջև, երբ մենք՝ այլ եվրոպացի առաջնորդների հետ ,Վաշինգտոնում էինք», – ասել է Մերցը՝ Ֆրանսիայի նախագահ Էմանուել Մակրոնի հետ համատեղ մամուլի ասուլիսում։
Ավելի վաղ՝ Ալյասկայում Պուտինի հետ հանդիպումից հետո, Թրամփը Վաշինգտոնում հանդիպել էր Զելենսկիի և ԵՄ առաջնորդների հետ, որի ավարտին հայտարարել էր, որ Ֆրանսիան, Գերմանիան և Մեծ Բրիտանիան ցանկանում են զորքեր տեղակայել Ուկրաինայի տարածքում։ Նա հավելել է, որ իր նախագահության ընթացքում ամերիկյան զորքեր Ուկրաինայում չեն լինի։
Եվրոպացի առաջնորդների հետ բանակցությունների ավարտից հետո, Թրամփը հայտնել է, որ զանգել է Պուտինին և պատրաստվում է Պուտինի և Զելենսկիի հանդիպմանը, որի արդյունքում հնարավոր է նաև եռակողմ հանդիպում՝ իր մասնակցությամբ։
Այդ ընթացքում Ռուսաստանի ղեկավարի միջազգային հարցերով օգնական Յուրի Ուշակովը նշել է, որ Պուտինը և Թրամփը հեռախոսազրույցի ընթացքում հանդես են եկել Ռուսաստանի և Ուկրաինայի պատվիրակությունների ուղղակի բանակցությունների շարունակման օգտին։ Այս համատեքստում քննարկվել է նաև այն գաղափարը, որ անհրաժեշտ է ուսումնասիրվել կողմերի ներկայացուցչական մակարդակը բարձրացնելու հնարավորությունը։
