Ծիծեռնակաբերդում վերանորոգման չէ, այլ քանդման աշխատանքներ են կատարվում․ Դեմոյանը պահանջում է դադարեցնել այն
Ծիծեռնակաբերդում ոչ թե վերանորոգման, այլ քանդման աշխատանքներ են կատարում. լրագրողների հետ զրույցում ասել է «Հայոց Ցեղասպանության թանգարան-ինստիտուտի» նախկին տնօրեն, պատմաբան Հայկ Դեմոյանը։
«Որևէ մեկը դեմ չէ, որ այստեղ վերանորոգման աշխատանքներ լինեն, բայց շրջելով տարածքով` կարող եմ վստահ ասել, որ հանցավոր անփութության և անպատասխանատու կերպով են մոտենում։ Այս աշխատանքները անվերականգնելի վնասներ են հասցնում ու հասցնելու պատմական այս հուշարձանին»,- ասել է Դոմյանը։
Նա պնդել է, որ կատարվողի համար մեկ մեղավորն ու պատասխանատուն ԿԳՄՍ նախարարությունն է` Ժաննա Անդրեասյանի գլխավորությամբ։ Մեծ վրդովմունք է առաջացրել նաև ընտրված բանվորական կազմը։
«Բանվորական անձնակազմը հայ չէ, նրանք հնդիկներ են, ռասիստական մոտեցում չէ, ուղղակի նրանք հայերեն չեն խոսում, անգլերենով փորձեցի երկու բառ փոխանակել, բայց մի կերպ են հասկանում։ Ինձ հետաքրքիր է՝ ինչպե՞ս են կատարում հրահանգները»,- ասել է Դեմոյանը։
Նա նշել է, որ շուտով հանցագործության մասին հաղորդում է տալու։ Պահանջել է դադարեցնել աշխատանքները, ստեղծել նոր հանձնախումբ ու խզել շինընկերության հետ պայմանագիրը։
